NATO harbiy qo‘mitasi Ukrainadagi urush bo‘yicha: mo‘jiza kutmayapmiz

Shimoliy Atlantika alyansi davlatlarining oliy harbiy rahbarlari Ukrainadagi vaziyatni batafsil o‘rganib chiqdi. «Dunyo 2023 yilda juda optimistik bo‘lgan bo‘lishi mumkin. 2024 yilda juda pessimistik bo‘lmaslik muhim», dedi NATO Harbiy qo‘mitasi raisi Rob Bauer 18 yanvar, payshanba kuni Bryusselda bo‘lib o‘tgan matbuot anjumanida.

Uning ta’kidlashicha, Rossiya ham, Ukraina ham «hozir vaziyat u yoki bu yo‘nalishda unchalik siljimaydigan bosqichda», u yaqin kelajakda «ikki tomondan ham mo‘jiza kutmasligimiz kerak» deb ogohlantirdi. Rossiyaning Ukrainaga qilgan so‘nggi hujumlari halokatli bo‘lishiga qaramay, ular harbiy jihatdan samarali emas va ruslar o‘zlarining hech qanday strategik maqsadlariga erisha olmadi, dedi u.

Rossiya qo‘shinlaridagi aralash holat

NATO ma’lumotlariga ko‘ra, so‘nggi ikki yil ichida Rossiyadan Ukrainaga o‘tkazilgan quruqlikdagi qo‘shinlar soni ko‘paygan, ammo ularning tayyorgarlik darajasi pasaygan. «Ular juda ko‘p tanklar, zirhli texnikalar, samolyotlar, vertolyotlarni yo‘qotdi. Ularning bir qismini qayta tiklamoqda, lekin bu eski yoki eskirgan modellar yoki zaxiradagi jihozlar», - dedi Bauer.

Shu bilan birga, Rossiyaning raketa salohiyati, alyansga ko‘ra, KXDR va, ehtimol, Erondan ishlab chiqarish va yetkazib berishning ko‘payishi hisobiga o‘sib bormoqda. «Biz ular Erondan raketa olishini kutyapmiz, - dedi Harbiy qo‘mita rahbari, - Albatta, ular Erondan dron va ularni ishlab chiqarish texnologiyasini ham oldi. Rossiya harbiy-havo kuchlari, dengiz floti, kosmik va kiberimkoniyatlariga kelsak, yo‘qotishlarga qaramay, ular hali ham jangovar holatda».

Alyansning fikricha, Rossiya harbiy salohiyatini tiklashga sanksiyalar, moliyaviy muammolar va zamonaviy qurollarni ishlab chiqarish quvvatlari yetarli emasligi to‘sqinlik qilmoqda. «Ammo, artilleriya va eski tanklar ishlab chiqarish borasida ular ancha yaxshi ishlamoqda. Shuning uchun, menimcha, miqdor sifatga aylanadi», - deya xulosa qildi Bauer.

O‘z navbatida, NATOning Yevropadagi ittifoqchi qo‘shinlari oliy qo‘mondoni, general Kristofer Kavoli Rossiya o‘z budjetining katta qismini harbiy ehtiyojlar uchun ajratayotgani va mudofaa sanoat bazasini «iloji boricha tezroq» ishga tushirayotganini ta’kidladi.

Ukrainaning jang maydonidagi yutuqlari

Shu bilan birga, Bryussel Ukrainaning harbiy muvaffaqiyatlarini, jumladan, Rossiyaning 300 ming halok bo‘lgan va yaralangan askarini, minglab yo‘q qilingan rus tanklari va zirhli texnikasini, shuningdek, yuzlab samolyotlarini sanab o‘tdi. «Ukrainaliklar o‘z yerlarining salmoqli qismini ozod qilishga muvaffaq bo‘ldi, ruslarni urush boshida egallab olgan hududlari qariyb 50 foizidan orqaga surishga erishdi, - dedi Bauer. - Yana bir afzalligi shundaki, ukrainaliklar chuqur zarba bera oldi. Ukraina haqiqiy harbiy-dengiz flotisiz Rossiya Qora dengiz flotini siqib chiqarib, «don yo‘lagi»ni ochishga muvaffaq bo‘lgani yana bir ulkan muvaffaqiyatdir».

NATO Harbiy qo‘mitasi rahbari so‘zlariga ko‘ra, uning barcha hamkasblari «ukrainalik birodarlari va opa-singillarini» himoya qilishda qat’iyliklarini tasdiqlagan. «Bu xayriya emas, - dedi u. - Ukrainani qo‘llab-quvvatlash bizning xavfsizligimiz uchun to‘g‘ridan to‘g‘ri sarmoyadir».

17 va 18 yanvar kunlari Bryusselda NATOning yuqori martabali harbiy rahbarlari uchrashuvi bo‘lib o‘tdi.