Qoʻshimcha funksionallar
-
Tungi ko‘rinish
FTB: Germaniya - Rossiya propagandasi va dezinformatsiyasi nishoni
Federal tergov byurosi dosesiga ko‘ra, Rossiya Ukrainani qo‘llab-quvvatlashga putur yetkazish, AQSh va NATOni qoralash uchun Germaniyada keng ko‘lamli dezinformatsion kampaniyalarni o‘tkazmoqda.
AQSh Federal tergov byurosi (FTB) 5 sentabr, chorshanba kuni e’lon qilgan hisobotiga ko‘ra, Rossiya Yevropa Ittifoqining ayrim mamlakatlarida, xususan, nemis jamiyatida kelishmovchilik keltirib chiqarish maqsadida dezinformatsion kampaniyalar olib bormoqda. 277 betlik FTB ma’lumotlari «yevropaliklarning qalbi va ongini zabt etish rejalari» tasvirlangan ko‘plab rus hujjatlarini o‘z ichiga oladi, deb yozadi Politico.
Moskvaning Germaniyadagi maqsadi - «AQSh va NATOni obro‘sizlantirish»
Rossiya Ijtimoiy loyihalashtirish agentligi yig‘ilishlaridan birining bayonnomasiga ko‘ra, Moskva Germaniya va Fransiyada dezinformatsion kampaniyalarni kuchaytirishga qaror qildi, xuddi shu protokolda «nemislar fransuzlarga qaraganda ko‘proq qaram» deb ta’kidlangan. Yig‘ilish ishtirokchilari Germaniyadagi bunday kampaniyalarning asosiy maqsadlari «Qo‘shma Shtatlar va NATOni obro‘sizlantirish», Ukrainani qo‘llab-quvvatlash qarorini buzish va nemislarni «sanksiyalarning samarasiz siyosatiga» ishontirish ekanligini bildirgan. FTB ta’kidlaganidek, agentlik Rossiya prezidenti ma’muriyati rahbarining birinchi o‘rinbosari Sergey Kiriyenkoga bo‘ysunadi.
Nemis auditoriyasi uchun oyiga 30 mingta sharh
Ijtimoiy loyihalashtirish agentligi loyihalaridan birining maqsadi «Izohda ishlash» deb atalib, Ukrainadagi urush va AQSh siyosati bilan bog‘liq «auditoriyada oqilona va hissiy reaksiyalarni uyg‘otishdan» iboratdir. «Ratsional» reaksiyaga misol sifatida: «Haqiqatan ham, biz Ukrainaga nima uchun yordam berishimiz kerak?» degan savol keltirilgan, hissiy reaksiyaga misol sifatida esa «Amerikaliklar qanday qabihlar!» deyiladi. Loyihaga ilova qilingan ma’lumotnomada nemis auditoriyasi uchun shunday xabarlar bilan har oy ijtimoiy tarmoqlarda 30 mingta izoh qoldirish kerakligi aytiladi. Xuddi shu ko‘rsatkichlar Fransiya uchun ham amal qiladi.
GuM partiyasi uchun «vatanparvarlar obrazi»ni yaratish
Germaniyaning T-Online nashri tomonidan olingan yana bir rus hujjatida aytilishicha, Rossiya «Germaniya uchun muqobil» o‘ng qanot populistik partiyasini «har qanday yo‘l bilan» qo‘llab-quvvatlab, GuM a’zolari uchun «demokratiya va milliy siyosat uchun aziyat chekayotgan vatanparvarlar obrazini» yaratishi kerakligi aytiladi.
AQSh Russia Today'ga qarshi sanksiyalar kiritdi
AQSh Moliya vazirligi 4 sentabr kuni «Moskvaning 2024 yilgi AQSh prezidentlik saylovlariga ta’sir o‘tkazishga urinishlari»ga aloqador 10 nafar shaxs va ikki tashkilotga nisbatan sanksiyalar joriy qildi. Xususan, Russia Today (RT) telekanallari xalqaro tarmog‘i va uning bosh muharriri Margarita Simonyan jazo choralariga tortildi.
