Shols - Ukrainada tinchlik jarayoniga o‘tishni tezlashtirish tarafdori

Germaniya kansleri Olaf Shols Ukrainada tinchlik jarayoniga o‘tish jarayonini tezlashtirish tarafdori ekanini aytdi. Vazirlar mahkamasi rahbari bu pozitsiyani ZDF nashriga yozgi katta intervyusida aytib o‘tdi, undan parchalarni kanal 8 sentabr, yakshanba kuni o‘z veb-saytiga joylashtirdi.

«O‘ylaymanki, hozir qanday qilib biz bu harbiy vaziyatdan tezda chiqib, tinchlikka erishishimiz mumkinligini muhokama qilish vaqti keldi», deb ta’kidladi Germaniya hukumati rahbari.

Shols Rossiyaning ikkinchi «tinchlik sammiti»da ishtirok etishini qo‘llab-quvvatlaydi. Uning birinchisi iyun oyida Shveytsariyaning Byurgenshtok kurortida bo‘lib o‘tdi. Kansler so‘zlariga ko‘ra, Moskvaning hozir bo‘lishi zarurligi masalasida Berlin Ukraina prezidenti Volodimir Zelenskiy pozitsiyasiga qo‘shiladi. «Albatta, yana bir tinchlik konferensiyasi bo‘ladi», dedi u, ammo aniq sanalarni ko‘rsatmadi.

Germaniya vazirlar mahkamasi rahbari Zelenskiy bilan maxfiy suhbatlashganini aytdi. U bilan yaxshi munosabatlar bor, deb ta’kidladi Shols.

Shols ishonch votumini zarur deb hisoblamaydi

ZDF nashriga bergan intervyusida kansler Germaniyaning ichki muammolariga ham to‘xtalib o‘tdi.

Germaniya Sotsial-demokratik partiyasining Saksoniya va Tyuringiyadagi saylovlarda yomon natijalari va hatto partiya tomonidan tanqid qilinganiga qaramay, Shols ishonch votumini zarur deb hisoblamayapti. Kansler bu boradagi takliflarni taxminan har «uch haftada» takrorlanadigan «muxolifatning kichik g‘oyasi» deb ta’rifladi.

«Hukumat ko‘pchilikka ega», deb ta’kidladi Shols. Uning qo‘shimcha qilishicha, vazirlar mahkamasi «Ukrainani qo‘llab-quvvatlash uchun» qo‘lidan kelganini qiladi. Uning fikricha, Saksoniya va Tyuringiyadagi saylov natijalari «ayrim fuqarolarning Ukrainani qo‘llab-quvvatlashimizga rozi emasligi bilan ham bog‘liq».

Germaniya kansleri «keyingi federal saylovlarda kuchli mandat olish» uchun kurashmoqchi ekanligini aytdi. «Biz bir marta muvaffaqiyatga erishdik», dedi Shols va partiyani «jangda suyagi qotgan partiya» deb atadi. Parlament fraksiyasining tanqidiga qaramay, partiyada birdamlik saqlanib qolyapti, deya qo‘shimcha qildi Shols. Bundestagga saylovlar 2025 yil 28 sentabrda bo‘lib o‘tadi.

Zelenskiy Hindistonda tinchlik sammitini o‘tkazish niyatida

Ukraina prezidenti Volodimir Zelenskiy Hindistonda tinchlik sammitini o‘tkazish taklifini bildirdi. Davlat rahbari ushbu taklifini Hindiston bosh vaziri Narendra Modi bilan uchrashuvda ilgari surgan, deb xabar beradi Bloomberg.

Zelenskiy noyabr oyida AQShda o‘tkaziladigan prezidentlik saylovlaridan oldin ikkinchi uchrashuvni o‘tkazishni rejalashtirmoqda. Manbalarning qayd etishicha, Modi hozircha bu turdagi sammitni o‘tkazishga rozilik bermagan. Zelenskiy matbuot kotibi Sergey Nikiforovning ma’lum qilishicha, keyingi sammitni janubiy davlatlardan birida, xususan, Hindistonda o‘tkazish imkoniyati ko‘rib chiqilmoqda.

O‘z navbatida Modi tinchlik jarayonida «konstruktiv rol» o‘ynashga tayyorligini bildirgan, biroq Hindiston TIV vakili Randhir Jaysvalning so‘zlariga ko‘ra, «bu bosqichda aniq mexanizmlar va yo‘llar haqida gapirishda juda erta».

Modi 23 avgust kuni Kiyevga tashrif buyurib, Ukraina suverenitetini qo‘llab-quvvatlashini bildirgan edi.