Sergelidagi portlash: 4 nafar ayblanuvchining har biri 5 yilga ozodlikdan mahrum qilindi

2023 yil 28 sentabr kuni soat 2:43 da Toshkent shahri Sergeli tumani Quruvchilar massivida Inter logistics kompaniyasi omborxonada kuchli portlash ro‘y bergan edi. Rasmiy ma’lumotlarga ko‘ra, hududdagi 39 ta ko‘p qavatli uyning 1370 ta xonadoni hamda 246 ta hovliga ziyon yetib, umumiy zarar miqdori 14,5 mlrd so‘mni tashkil etgandi. Fojia oqibatida 1 nafar o‘smir vafot etgan, 100 dan ortiq kishi jabrlangandi.

Daryo.uz nashrining xabar berishicha, 11 oktyabr kuni Jinoyat ishlari bo‘yicha Mirobod tuman sudida sudya Dadaboyeva raisligida mazkur ish ko‘rib chiqildi. 4 nafar sudlanuvchining har biri Jinoyat kodeksining 259-moddasi 2-qismi “a” hamda “b” bandlari nazarda tutilgan jinoyatlar — “odam o‘lishi va boshqa og‘ir oqibatlar kelib chiqishiga sabab bo‘lgan holda yong‘in xavfsizligi qoidalarining shu qoidalar bajarilishi uchun mas’ul bo‘lgan shaxs tomonidan buzilishi”da aybdor deb topilgan. Sudlanuvchilarga, ushbu modda uchun nazarda tutilgan eng og‘ir jazolar tayinlangan, xususan:

Inter Logistics MChJ direktori Firdavs Sayiddinov – Jinoyat kodeksining 259 modda, 2 qismi “a” va “b” bandlari bilan aybdor, deb topilgan. U shu modda bilan 2 yil davomida “rahbarlik va yong‘in xavfsizligi vazifalari yuklatilgan lavozimlarda ishlash huquqi”dan mahrum etilib, 5 yil muddatga ozodlikdan mahrum qilish jazosi tayinlandi. Tayinlangan jazoni manzil koloniyada o‘tash belgilandi.

Inter Logistics MChJ qo‘riqlash xizmati boshlig‘i Farhod Abdurahimov – Jinoyat kodeksining 259 modda, 2 qismi “a” va “b” bandlari bilan aybdor, deb topilgan. U shu modda bilan 2 yil davomida “rahbarlik va yong‘in xavfsizligi vazifalari yuklatilgan lavozimlarda ishlash huquqi”dan mahrum etilib, 5 yil muddatga ozodlikdan mahrum qilish jazosi tayinlandi. Tayinlangan jazoni manzil koloniyada o‘tash belgilandi.

Polychem MChJ direktori Sardor Bahromov – Jinoyat kodeksining 259 modda, 2 qismi “a” va “b” bandlari bilan aybdor, deb topilgan. U shu modda bilan 2 yil davomida “rahbarlik va yong‘in xavfsizligi vazifalari yuklatilgan lavozimlarda ishlash huquqi”dan mahrum etilib, 5 yil muddatga ozodlikdan mahrum qilish jazosi tayinlandi. Tayinlangan jazoni manzil koloniyada o‘tash belgilandi.

Polychem MChJ ombor mudiri Kamoliddin Nazarov – Jinoyat kodeksining 259 modda, 2 qismi “a” va “b” bandlari bilan aybdor, deb topilgan. U shu modda bilan 2 yil davomida “rahbarlik va yong‘in xavfsizligi vazifalari yuklatilgan lavozimlarda ishlash huquqi”dan mahrum etilib, 5 yil muddatga ozodlikdan mahrum qilish jazosi tayinlandi. Tayinlangan jazoni manzil koloniyada o‘tash belgilandi.

Barcha ayblanuvchilar uchun jazo muddatini o‘tash – 2023 yil 29 sentabr boshlab hisoblangan hamda qamoqqa olish ehtiyot chorasi aslicha qoldirilgan.

Sud tomonidan sudlanuvchilar hamda Inter Logistics MChJ, Polychem MChJdan o‘nlab fuqaroviy jabrlanuvchilar va da’vogarlar foydasiga 282 milliard so‘m mablag‘ni solidar tartibda undirishi belgilandi.