Halokatga uchragan AZAL samolyotining «qora quti»lari tahlili yakunlandi

Qutilardan olingan yozuvlar Qozog‘istonga topshiriladi. Yakuniy hisobot Qozog‘iston aviahalokatni tekshirish qo‘mitasi tomonidan e’lon qilinishi kutilmoqda.

Foto: Anadolu Agency

Braziliyaning Aviahalokatlarni o‘rganish va oldini olish markazi (CENIPA) 25 dekabr kuni Qozog‘istonning Oqtov shahri yaqinida halokatga uchragan AZAL aviakompaniyasining Embraer 190 samolyoti «qora quti»lari tahlilini yakunladi. Bu haqda G1 portaliga tayanib Anadolu xabar berdi.

Tekshiruvda ishtirok etgan manbalarga ko‘ra, «ikkita qayd qiluvchi qurilmadagi ma’lumotlarni olish va tekshirish jarayoni» 4 yanvar kuni yakunlangan.

Ta’kidlanishicha, Qozog‘iston, Ozarboyjon va Rossiya vakillari ma’lumotlarni tahlil qilish ishlarini kuzatish uchun Braziliyaga kelgan. Ular qutilarni ochish jarayonida hozir bo‘lgan.

Endi «qora quti»lardan olingan ma’lumotlar avariyani tahlil va tergov qilish uchun mas’ul bo‘lgan Qozog‘iston aviahalokatni tekshirish qo‘mitasiga topshiriladi.

«Qora quti»lardagi yozuvlarda nimalar aniqlangani hozircha noma’lum. Avariyani tekshirish natijalari yakuniy hisobotda Qozog‘iston aviahalokatni tekshirish qo‘mitasi tomonidan e’lon qilinishi kutilmoqda.

25 dekabr kuni AZAL aviakompaniyasining Boku-Grozniy reysini amalga oshirayotgan yo‘lovchi Embraer 190 samolyoti Oqtov yaqinida halokatga uchradi. Samolyotda bo‘lgan 67 kishidan 38 nafari halok bo‘lgan edi. Bu rusumdagi samolyotlar Braziliyada ishlab chiqariladi.

#Rossiya #Qozog‘iston #aviahalokat #Ozarboyjon

25 dekabr tongida Bokudan Grozniyga uchgan samolyot yo‘nalishini o‘zgartirib, Qozog‘istonning Oqtov shahri aeroporti yaqinida avariyaviy qo‘nishni amalga oshirdi. Aviahalokatda 38 kishi halok bo‘ldi.