Shvetsiyada Salvan Momika otib ketildi. Ushbu iroqlik bir necha bor omma oldida Qur’onni yoqqandi

Iroqlik qochqin va islom dini tanqidchisi, 38 yoshli Salvan Momika Shvetsiyadagi uyida otib ketildi. Bu haqda 30 yanvar kuni SVT va Expressen nashrlari xabar berdi.

Uning o‘qotar qurol izlari qolgan jasadi Stokholm yaqinidagi Syodertele shahrining Xovshyo tumanidagi kvartirasidan topilgan. OAV ma’lumotiga ko‘ra, politsiya va tez yordam ko‘p kvartirali uyga 29 yanvar kuni kechqurun chaqirilgan. Tun davomida politsiya ushbu hududda yirik amaliyot o‘tkazgan. OAV ma’lumotiga ko‘ra, qotillikka aloqadorlikda gumonlangan besh kishi qo‘lga olingan.

Qotillikdan biroz oldinroq Momika TikTok’da jonli efir o‘tkazayotgandi va suiqasdning ayrim epizodlari videoga tushib qolgan bo‘lishi mumkin, deb yozadi Expressen.

Politsiya qurbonning shaxsini ochiqlamagan. Bu Salvan Momika ekani haqida uning hamkori Salvan Najim xabar bergan. Ro‘y bergan qotillikdan keyin Najim X ijtimoiy tarmog‘ida shunday xabar qoldirgan: «Keyingisi menman».

Salvan Momika Qur’on yoqish aksiyalaridagi ishtiroki bilan tanilgandi. U va uning sherigi Salvan Najim 2023 yilda to‘rt marta Qur’on nusxalarini yoqish aksiyalarini o‘tkazganidan keyin, irqiy nafrat qo‘zg‘atishda ayblangandi. 30 yanvar kuni unga Qur’on yoqish orqali odamlar orasiga nizo solish ishi bo‘yicha hukm o‘qilishi kerak edi. Stokholm okrug sudi «ayblanuvchilardan biri o‘lgani» uchun hukm chiqarishni keyinga qoldirdi, deb yozadi SVT.

Salvan Momikaning harakatlari tufayli musulmon davlatlarda ommaviy norozilik aksiyalari o‘tkazilgandi. Expressen ma’lumotiga ko‘ra, Iroqning Al-Kufa shahrida uni o‘ldirganlik uchun ikki million dollar mukofot va ikki kilogramm oltindan tayyorlangan Qur’on nusxasi sovg‘a qilish va’da qilingandi. Iroq hukumati uni ekstraditsiya qilishni talab qilgan.

Salvan Momika Shvetsiyaga 2018 yilda borgan. 2023 yil kuzida uning mamlakatda vaqtincha yashash ruxsatnomasi bekor qilingan, u Norvegiyada boshpana olishga harakat qilgan, ammo ko‘p o‘tmay Shvetsiyaga qaytgan va 2024 yilda unga yangi yashash ruxsatnomasi berilgandi. Migratsiya komissiyasi u Iroqqa qaytgan taqdirda qiynoqlarga duchor bo‘lishi mumkin deb topgan.