Yangi samolyot hali buyurtmachiga topshirilmagan. U dastlab tekshiruv va sinovlardan oʻtishi, keyin ilk parvozini amalga oshirishi kerak. Shundan soʻng uni Shvetsiya tomoniga yetkazib berish koʻzda tutilgan.
GlobalEye uzoq masofadan radiolokatsion kuzatuv olib borish, nishonlarni aniqlash va harbiy harakatlarni muvofiqlashtirish imkoniyatlarini birlashtiradi. Tizim havo, quruqlik va dengizdagi vaziyat haqida maʼlumot toʻplab, qoʻmondonlikka umumiy manzarani koʻrishga yordam beradi.
Samolyot keng hududlardagi faollikni aniqlash va kuzatishga moʻljallangan. Undan olingan axborot tahdidlarga oʻz vaqtida javob berish, operatsiyalarni rejalashtirish va kuchlar harakatini muvofiqlashtirishda qoʻllanadi.
Shvetsiya ushbu samolyotlar yordamida milliy havo hududi va unga tutash dengiz yoʻnalishlarida kuzatuv imkoniyatlarini kuchaytirishni koʻzlamoqda.
AviTrader xabariga koʻra, Shvetsiya Mudofaa taʼminoti boshqarmasi Saab bilan dastlabki shartnomani 2022-yilda tuzgan. Unda ikkita GlobalEye yetkazib berish va keyinchalik qoʻshimcha samolyotlar buyurtma qilish imkoniyati nazarda tutilgan.
2024-yilda uchinchi samolyot ham buyurtma qilingan. Shu tariqa Shvetsiya uchun tayyorlanadigan GlobalEye’lar soni uchtaga yetgan.
