9-sentabr kuni Toshkent xalqaro aeroportiga Shvetsiya va Polshadan Oʻzbekiston fuqarolarini olib kelgan charter reysi qoʻndi. Bu haqda “Dunyo” axborot agentligi xabar berdi.
Maʼlum qilinishicha, reysda ushbu Yevropa mamlakatlarining migratsiya qonunchiligini buzgan 27 nafar Oʻzbekiston fuqarosi boʻlgan.
Vatandoshlarni Oʻzbekistonga qaytarish ishlari Oʻzbekiston, Shvetsiya va Polshaning vakolatli idoralari oʻrtasidagi hamkorlik doirasida tashkil etilgan.
Toshkent xalqaro aeroportida fuqarolarni Tashqi ishlar vazirligi va boshqa masʼul idoralar vakillari kutib olgan. Qaytarilgan fuqarolar vatanga kelishlariga koʻmaklashgani va koʻrsatilgan yordam uchun mamlakat rahbariyati hamda vakolatli organlarga minnatdorlik bildirgan.
“Dunyo” AAga koʻra, mazkur chora-tadbirlar Oʻzbekistonning xalqaro majburiyatlar va mezbon mamlakatlar qonunchiligiga rioya qilgan holda xorijdagi fuqarolarining huquq va manfaatlarini himoya qilishga qaratilgan ishlar doirasida amalga oshirilmoqda.
Shuningdek, xorijga chiqayotgan Oʻzbekiston fuqarolarining huquqiy savodxonligini oshirish, ularni qabul qiluvchi davlatlardagi migratsiya talablari bilan tanishtirish hamda qonunbuzilishlarning oldini olish boʻyicha ishlar davom ettirilayotgani bildirildi.
