Zelenskiy: Ukraina qurolli kuchlari Kursk oblastida operatsiyani yakunladi

Ukraina Qurolli kuchlarining Kursk oblastidagi operatsiyasi «o‘z vazifasini bajardi», dedi mamlakat prezidenti Volodimir Zelenskiy 14 mart, juma kuni Kiyevda jurnalistlarga. Unga ko‘ra, Ukraina Qurolli kuchlarining Kursk hujumi natijasida Rossiya armiyasi o‘z kuchlarining bir qismini Xarkiv va Pokrovsk yo‘nalishlaridan olib chiqib ketgan. Natijada u yerda vaziyat «barqarorlashdi» va Rossiya Qurolli kuchlari endi «Pokrovskni yana ishg‘ol qilish imkoniyatini topishi juda qiyin bo‘ladi», deb hisoblaydi Zelenskiy.

Zelenskiy: Rossiya urushni davom ettirishga intilyapti

Ukraina prezidenti Volodimir Zelenskiy uch yildan ko‘proq vaqt oldin Ukrainaga qarshi tajovuzkor urush boshlagan Rossiyani tinchlik kelishuvini ataylab kechiktirayotganlikda aybladi. «Afsuski, bir kundan ortiq vaqtdan beri dunyo bildirilgan takliflarga nisbatan Rossiya tomonidan mazmunli javob eshitmayapti. Va bu aynan Rossiya urushni davom ettirishga intilayotganini va tinchlik boshlanishini imkon qadar kechiktirishga harakat qilishini yana bir bor tasdiqlaydi», deb yozdi u Telegramʼda 13 mart kuni tushdan keyin. U, shuningdek, «AQShning bosimi Rossiyani urushni tugatishga majbur qilish uchun yetarli bo‘lishiga» umid bildirdi.

Zelenskiy: Rossiya o‘t ochishni to‘xtatishdan bosh torsa, Ukrainani mustahkamlash kerak bo‘ladi

Ukraina prezidenti Volodimir Zelenskiy Rossiyani AQShning Kiyev va Moskva o‘rtasida 30 kunlik o‘t ochishni to‘xtatish haqidagi taklifiga javob berishga chaqirdi. «Hammasi Rossiya o‘t ochishni to‘xtatish va tinchlanishni xohlaydimi yoki odamlarni o‘ldirishda davom etishni xohlaydimi, bunga bog‘liq», dedi u 12 mart kuni Kiyevda.

Avvalroq Ukraina 30 kunlik otashkesimga rozi bo‘lgan, endi esa Moskva o‘z javobini berishi kerak, dedi Zelenskiy.