Soliq huquqbuzarliklari haqida xabar berganlar 14,5 mlrd so‘m mukofot oldi

O‘zbekistonda yil boshidan buyon soliq huquqbuzarliklari haqida xabar berganlarga 14,5 milliard so‘m mukofot to‘landi.

2025 yilning yanvar-may oylarida “Soliq” mobil ilovasining “Soliq hamkor” tizimi orqali soliq huquqbuzarliklari haqida 45 496 ta murojaat kelib tushgan.

Shundan:

40 903 tasi xarid cheki bermaslik;
1 559 tasi to‘lovni plastik karta orqali qabul qilmaslik;
113 tasi plastik karta uchun xarid summasini oshirish;
2 921 tasi boshqa turdagi huquqbuzarlik holatlari bo‘yicha.

Murojaatlarning 21 510 tasi takroriy bo‘lgani yoki shikoyat kelib tushgan tadbirkorlik sub’yektida tekshiruv davom etayotgani sababli ko‘rib chiqilmagan. Murojaatlar asosida 18 140 ta sayyor soliq tekshiruvi o‘tkazilib, 99,1 foiz holatda huquqbuzarlik tasdiqlangan.

Huquqbuzarlik holatlari bo‘yicha xabar bergan fuqarolarga 20 358 ta holat bo‘yicha (undirilgan jarima summasidan 20 foiz) 14,5 milliard so‘m mukofot to‘langan.