Rossiya O‘zbekistonda rus tilini targ‘ib qilish bo‘yicha tadqiqot olib boradi

Rossiyada rus tilini xorijda targ‘ib qilish bo‘yicha tadqiqot o‘tkaziladi, deb yozdi «Vedomosti». 34,8 million rubllik tegishli tenderni Butunrossiya jamoatchilik fikrini o‘rganish markazi (VsIOM) yutib olgan.

Nashrning yozishicha, Tashqi ishlar vazirligi topshirig‘i bilan VsIOM rus tilini xorijda, xususan, Ozarboyjon va O‘zbekistonda targ‘ib qilish bo‘yicha sotsiologik tadqiqot o‘tkazadi.

Rus tilini qo‘llab-quvvatlash bo‘yicha chora-tadbirlar samaradorligi Venesuela, Hindiston, BAA va Xitoyda ham o‘rganiladi.

2024 yilda VsIOM birinchi marta ish geografiyasini kengaytirib, Isroil, Hindiston, Qozog‘iston, Xitoy, Kuba va Misrda rus tilining holatini o‘rgangan edi.

Har bir davlatda kamida 1500 respondent onlayn so‘rovdan va kamida 1000 respondent telefon va shaxsiy suhbatlar orqali so‘rovdan o‘tkazilishi kerak. Tadqiqotning o‘zi bilan bir qatorda, VsIOM chet elda rus tilidan foydalanish ko‘rsatkichlarini ekspertizadan o‘tkazishi va ko‘rsatilgan mamlakatlarda uning jozibadorligini oshirish bo‘yicha tavsiyalar ishlab chiqishi kerak.

Imtihonni tilshunoslik, xalqaro aloqalar, madaniyatshunoslik va ommaviy axborot vositalari sohasidagi 10 nafar mutaxassis olib boradi. Tashqi ishlar vazirligi, «Rossotrudnichestvo», Ta’lim va fan vazirligi va boshqa tegishli idoralar chet elda rus tilini targ‘ib qilish bilan shug‘ullanadi.

«Rossotrudnichestvo» ma’lumotlariga ko‘ra, 2023 yil bo‘yicha Markaziy Osiyoning barcha davlatlari orasida Qozog‘iston rus tilidagi maktablar soni bo‘yicha yetakchilik qilmoqda – 3606 ta. O‘zbekistonda ta’lim rus tilida olib boriladigan 1 mingdan sal ko‘proq maktab, jumladan aralash maktablar, Qirg‘izistonda – 751, Tojikistonda – 200, Turkmanistonda – 71 maktab mavjud.

Avvalroq, Ozarboyjonda rus tilida ta’lim beruvchi maktablar bosqichma-bosqich yopilishi haqida xabar berilgan edi.