877 ot kuchi, muzlatkich va lidar. Yangilangan Tank 500 savdolari boshlandi

Xitoyda yangilangan Tank 500 hibrid yo‘ltanlamasi faqat dvigatellari va batareyalari farq qiladigan Hi4-T va Hi4-Z komplektatsiyalarida sotuvga chiqdi. Modelning yangilanganini uning old oynasi tepasidagi lidardan darhol sezish mumkin. Lidar ikkala versiyada ham mavjud. Yo‘ltanlamas haydovchi uchun yordamchi tizim — Coffee Pilot Ultra’ning uchinchi avlodini qo‘llab-quvvatlaydi. Tizim tarkibiga 27 ta sensorli qurilma kiradi (lidar, uchta millimetr diapazondagi radar, 12 ta ultratovush sensori va 11 ta yuqori aniqlikdagi kamera mavjud). 

Yo‘ltanlamas salonida qator qulayliklar mavjud: 5,4 litr sig‘imli muzlatkich, bir emas, ikkita smartfonni simsiz quvvatlash moslamasi. Harakat rejimini ruldagi tugmacha orqali ham o‘zgartirish mumkin.

Ikkala komplektatsiya ham 2 litr sig‘imli benzinli dvigatel bilan jihozlangan. Hi4-T benzinli dvigateldan tashqari bitta elektromotor hamda 37,1 kWh batareyaga ega. Dvigatellar maksimum 408 ot kuchini beradi. Faqat tokning o‘zida WLTC sikli bo‘yicha 110 km masofa bosib o‘ta oladi. Uzatmalar qutisi esa to‘qqiz pog‘onali avtomat hisoblanadi.

Hi4-Z komplektatsiyasiga esa ikkita elektromotor, uch pog‘onali DHT transmissiya, 59,05 kWh batareya o‘rnatilgan. U faqat tokning o‘zida 200 km masofa bosib o‘tishi mumkin. Dvigatellar jami 877 ot kuchini bera oladi.

Hi4-T narxi 360 ming yuan (50 ming dollar), Hi4-Z esa 388,8 ming yuan (54 ming dollar) etib belgilangan.