Meloni Ukraina uchun «yengilroq NATO» taklif qildi – OAV

Yevropa yetakchilari Italiya bosh vaziri Jorja Meloni tashabbusi bilan ishlab chiqilgan Ukraina uchun yangi xavfsizlik mexanizmini muhokama qilmoqda. Rejaga ko‘ra, Kiyevning ittifoqchilari Rossiya tomonidan tajovuz qayta boshlangan taqdirda Ukrainani harbiy yoki iqtisodiy qo‘llab-quvvatlash to‘g‘risida 24 soat ichida qaror qabul qilish majburiyatini oladi, deb yozdi Bloomberg.

Taklif Alyansning kollektiv mudofaa tamoyilini eslatgani, biroq Ukrainaning NATOga haqiqiy a’zoligini nazarda tutmagani uchun «yengilroq NATO» deb nomlangan. Meloni rejasiga ko‘ra, Kiyev bilan ikki tomonlama shartnoma imzolagan davlatlar yangi hujum sodir bo‘lgan taqdirda o‘z harakatlarini zudlik bilan muvofiqlashtirishi kerak.

Manbalarga ko‘ra, gap Ukrainaga tezkor mudofaa yordami, moliyaviy yordam, Qurolli kuchlarni mustahkamlash va Rossiyaga qarshi sanksiyalar haqida ketmoqda. Rejaga qo‘shinlarni to‘g‘ridan-to‘g‘ri Ukraina hududiga yuborish kiradimi yoki yo‘qmi, hozircha noma’lum.

G‘oya AQSh prezidenti Donald Tramp, Volodimir Zelenskiy va Yevropa yetakchilarining Vashingtondagi uchrashuvi fonida yangradi. Muzokaralardan so‘ng Tramp AQSh xavfsizlik kafolatlarini ta’minlashga tayyorligini tasdiqladi, biroq Ukrainaga amerikalik askarlarni yuborishni istisno qilib, buning o‘rniga havo yordami ko‘rsatilishi mumkinligini ma’lum qildi.

Italiya mudofaa vaziri Gvido Krozetto yakuniy format hali ham muhokama qilinayotganini ta’kidladi: «Yoki NATO Ukrainani himoya qilishi mumkin, yoki alohida davlatlar bunday majburiyatlarni o‘z zimmasiga oladi. Eng yaxshi mexanizm vaqt o‘tishi bilan tanlanadi».

Melonining ta’kidlashicha, tashabbus «NATOning 5-moddasi modeli» bo‘lib, hozirgi sharoitlarga moslashtirilgan. Uning ta’kidlashicha, Rim Kiyevni qo‘llab-quvvatlashda birdamlikni saqlab, AQSh va Yevropa o‘rtasida «ko‘prik» bo‘lishga intilmoqda.