Ispaniyaga kelayotgan afrikalik noqonuniy migrantlar yo‘lda jodugarlikda ayblanib o‘ldirilgan - OAV

Kema Kanar orollaridan 426 km uzoqlikda halokatga uchragan. Daily Mail’ning yozishicha, Ispaniya qirg‘oq qo‘riqlash xizmati 251 kishini qutqargan. Safarga chiqqanlardan 70 ga yaqini halok bo‘lgan, ularni hamrohlari jodugarlik va suv o‘g‘irlashda ayblab o‘ldirgan bo‘lishi mumkinligi ta’kidlanmoqda.

Qutqarilgan migrantlar yo‘lovchilarning bir qismi suvsizlik va ochlikdan halok bo‘lganini, boshqalari esa suvsizlanish ortidan alahsirab o‘zini bortdan tashlaganini aytgan. Ba’zi guvohlar qotilliklarni ham tasdiqlagan. OkDiario manbalariga ko‘ra, bir necha yosh yo‘lovchi bortdagilardan qutulishga qaror qilib, avvaliga ularni mayda o‘g‘rilik yoki suv zaxiralarini tugashida ayblagan. Bu ish bermagach, ularni jodugarlikda ayblab o‘ldirishgan. Guvohlarning aytishicha, ba’zilarini otib tashlashgan, boshqalarini esa bortdan uloqtirishgan.

Ispaniya politsiyasi holat yuzasidan tergov boshlagan. 2 sentabr kuni “mazkur voqealarga aloqador” bir necha kishi hibsga olingan.