Retsept bilan beriladigan dorilarni elektron retsept asosida tayinlash tartibi belgilandi

Hukumat qarori (570-son, 08.09.2025 y.) bilan “Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi to‘g‘risida”gi nizom tasdiqlandi.

Unga ko‘ra, shifokor yoki hamshira bemor haqida kerakli ma’lumotlarni tibbiyot muassasasidagi maxsus kompyuter tizimiga kiritadi. Ushbu ma’lumotlar avtomatik ravishda “Elektron tibbiy karta”ga o‘tadi. Bemorga dori kerak bo‘lsa, shifokor uni endi qog‘ozda yozib bermaydi, aynan shu tizim orqali elektron retsept shaklida rasmiylashtiradi.

Elektron retsept davolovchi shifokor tomonidan elektron imzo yoki boshqa usulda tasdiqlanadi va unga avtomatik tarzda QR-kod qo‘yiladi.

Shundan so‘ng, retseptga oid ma’lumotlar tizimdagi “Elektron retsept” moduliga o‘tadi. Shifokor o‘zi yozgan dori vositalarining dorixona orqali sotilguniga qadar bo‘lgan barcha jarayonni kuzatib borishi mumkin.

Retseptga oid barcha ma’lumotlar esa bemorning elektron tibbiy kartasiga avtomatik yoziladi.

Qarorda keltirilishicha, elektron retsept asosida beriladigan dori vositalari O‘zbekistonda ro‘yxatdan o‘tgan bo‘lishi kerak.