“2 nafar bola shifokorlar kuzatuvida qolmoqda” – SSV Forishdagi holat bo‘yicha bayonot berdi

Forishda ovqatdan zaharlangani gumon qilinayotgan bog‘cha bolalarining ahvoli barqaror. Bu haqda Sog‘liqni saqlash vazirligi ma’lum qildi.

Qayd etilishicha, 2025 yil 9 oktyabr kuni Jizzax viloyati Forish tumanidagi bir nechta maktabgacha ta’lim tashkilotlarining ayrim tarbiyalanuvchilarida yengil noxushlik, haroratning ko‘tarilishi, ko‘ngil aynishi va qisqa muddatli ovqat hazm qilish buzilishi belgilari kuzatilgan.

“Ularga o‘z vaqtida zarur tibbiy yordam ko‘rsatilgan. Hozirgi paytda barcha bolalarning ahvoli barqaror, sog‘lig‘iga xavf yo‘q. Faqat 2 nafar bola profilaktika maqsadida shifokorlar kuzatuvida qolmoqda.

Dastlabki ma’lumotlarga ko‘ra, noxushlik holati oziq-ovqat omillari bilan bog‘liq bo‘lishi ehtimol qilinmoqda. Aniq sabab laboratoriya tahlillari natijalariga ko‘ra belgilanadi”, deyiladi vazirlik bayonotida.

Ma’lum qilinishicha, hozirda Sanitariya-epidemiologik osoyishtalik xizmati mutaxassislari tomonidan oziq-ovqat mahsulotlari va suvdan namuna olingan, tadqiqotlar olib borilmoqda. Vaziyat tegishli xizmatlar tomonidan to‘liq nazoratga olingan.

Avvalroq Forish tumanidagi 4 ta davlat maktabgacha ta’lim muassasasining 37 nafar tarbiyalanuvchisi isitma ko‘tarilishi, ko‘ngil aynishi va holsizlik kabi shikoyatlar bilan shifoxonaga murojaat etgani xabar qilingandi. Keyinchalik Forish tumani hokimligi rasmiy kanalida bu haqdagi bayonot tahrirlanib, bolalar soni 35 nafarga kamaytirib qo‘yildi.