UzAuto Motors’ning O‘zbekiston bozoridagi ulushi 83 foizgacha qisqardi

O‘zbekistonda 2025 yilning yanvar-sentabr oylarida 296 331 dona avtomobil sotilgan. Bu – «O‘zavtosanoat» AJ tayyorlagan hisobotda keltirib o‘tilgan.

Qayd etilishicha, hisobot davrida UzAuto Motors 141 304 dona, Khorezm Auto 103 837 dona, ADM Jizzakh 32 987 dona, BYD Uzbekistan Factory 16 846 dona, Asaka Motors 937 dona, SamAuto 341 dona, Alyans Auto 79 dona avtomobilni xaridorlarga yetkazib bergan. Taqqoslash uchun, 2024 yilning yanvar-sentabr oylarida Shevrolet brendi ostidagi 303 373 dona mashina sotilgan. Bu joriy yildagi sotuv miqdoridan ham 26 mingtaga ko‘p.

Hisobot davrida korxonalarning ichki bozordagi ulushi quyidagicha:

• UzAuto Motors – 47,7 foiz;
• Khorezm Auto – 35 foiz;
• ADM Jizzakh – 11,1 foiz;
• BYD Uzbekistan Factory – 5,7 foiz;
• Asaka Motors – 0,3 foiz;
• SamAuto – 0,1 foiz.
• Alyans Auto – 0,03 foiz;

Eng ko‘p sotilgan avtomobil – Cobalt. Hisobot davrida 95 362 dona ushbu modeldagi avtomobil sotilgan.

Keyingi o‘rinlarda Damas (78 712 dona) va Tracker (27 921 dona) qayd etilgan. Xaridorlar 25 129 ta Labo'ga buyurtma bergan.

Ma’lumot uchun, O‘zbekistonda 2024 yilda 402 391 dona avtomobil sotilgan. Xususan, UzAuto Motors 353 730 dona (87,9 foiz), ADM Jizzakh 30 329 dona (7,5 foiz), BYD Uzbekistan Factory 17 132 dona (4,3 foiz), Asaka Motors 489 dona (0,1 foiz), Jizzakh Auto 394 dona (0,1 foiz), SamAuto 317 dona (0,1 foiz) avtomobilni xaridorlarga yetkazib bergan.