Xitoyning BYD kompaniyasi tormoz tizimidagi nuqsonlar tufayli 183 mingdan ortiq avtomobiliga texnik xizmat koʻrsatadi. Bu haqda Xitoy Bozorni tartibga solish davlat boshqarmasi xabar berdi.
Xitoy regulyatori maʼlumotlariga koʻra, qoʻshimcha xizmat koʻrsatish dasturi faqatgina Xitoy ichki bozori uchun 2014-yildan 2022-yilgacha ishlab chiqarilgan quyidagi modellarni oʻz ichiga oladi: 2015-yil 28-martdan 2018-yil 21-dekabrgacha boʻlgan davrda ishlab chiqarilgan 58 ming 26 ta Tang seriyasi, 2018-yil 19-maydan 2022-yil 14-yanvargacha boʻlgan davrda ishlab chiqarilgan 77 ming 846 ta yangi avlod Tang DM, 2018-yil 27-dekabrdan 2021-yil 25-oktabrgacha boʻlgan davrda ishlab chiqarilgan 7 ming 23 ta yangi avlod Tang EV hamda 2014-yil 27-iyundan 2019-yil 9-iyungacha boʻlgan davrda ishlab chiqarilgan 40 ming 316 ta Qin seriyasidagi avtomobillar. Chaqirilib olinayotgan umumiy mashinalar soni 183 ming 211 tani tashkil etadi.
Muammo nimada?
Tekshiruvlar natijasida tormoz pedalini cheklovchi maxsus detal materialida ishlab chiqarish nuqsoni borligi aniqlangan. Avtomobildan uzoq muddat foydalanish oqibatida ushbu detal yorilishi yoki sinib, oʻz joyidan tushib ketishi mumkin. Eng xavfli jihati shundaki, detal ishdan chiqqanda haydovchi tormoz pedalini bosmagan taqdirda ham, mashinaning orqa tormoz chiroqlari toʻxtovsiz yonib turaveradi. Bu holat esa ortdan kelayotgan boshqa haydovchilarga notoʻgʻri signal berib, yoʻllarda jiddiy avariya holatlarini keltirib chiqarishi mumkin.
