Oxirgi 4 yilda 177 nafar inson doridan zaharlanib o‘lgan

Qonunchilik palatasining 14 oktyabr kungi majlisida retsept bilan beriladigan dori vositalarining noqonuniy aylanmasi uchun javobgarlikni kuchaytirishni nazarda tutuvchi qonun loyihasi birinchi o‘qishda ko‘rib chiqildi.

Deputat Tohir Polvonovning ma’lum qilishicha, 2021-2024 yillarda dori vositalaridan zaharlangan shaxslar soni 18 ming nafardan oshgan.

«Retsept bilan beriladigan dori vositalarining noqonuniy aylanishi fuqarolarda turli og‘irlikdagi zaharlanish va o‘lim holatlarini keltirib chiqaradi. Statistik ma’lumotlarga ko‘ra, 2021-2024 yillarda dori vositalaridan zaharlangan shaxslar soni 18 ming nafardan oshgan. Shundan 177 nafar insonda o‘lim holati kuzatilgan», dedi Tohir Polvonov.

Uning qo‘shimcha qilishicha, 2022-2024 yillar va 2025 yilning dastlabki 5 oyida 288 ta holatda umumiy qiymati 18 mlrd so‘mlik 285 ming dona dori vositalarining noqonuniy aylanmasiga chek qo‘yilgan.

Qonun loyihasi bilan Ma’muriy javobgarlik to‘g‘risidagi kodeksga quyidagi o‘zgartirishlarni kiritish taklif etilyapti:

· tarkibida kuchli ta’sir qiluvchi moddalar mavjud bo‘lmagan dori vositalarini retsept bo‘yicha chakana realizatsiya qilish tartibini buzganlik uchun jarimalar miqdorini BHMning 50 baravaridan 100 baravarigacha oshirish;

· tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzganlik uchun jarimalar miqdorini 100 baravaridan 200 baravarigacha oshirish.

Bundan tashqari, Jinoyat kodeksiga ham quyidagi o‘zgartirishni kiritish taklif etilyapti:

· tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish, shunday harakat uchun ma’muriy jazo qo‘llangandan keyin ko‘p miqdorda sodir etilgan taqdirda, BHMning 200 baravaridan 300 baravarigacha qilib belgilash.