26 oktyabrdan 80-, 114- va 127-sonli avtobuslar BRT yo‘lagida harakatlanadi

Shahar transport tizimini modernizatsiya qilish doirasida Shota Rustaveli ko‘chasining o‘rta qismida markaziy avtobus yo‘lagi joriy etildi. BRT qatlami faqat avtobuslar uchun mo‘ljallangan bo‘lib, ushbu qatlamda boshqa transport vositalarining harakatlanishi va to‘xtashi qat’iyan taqiqlanadi. Markaziy yo‘lak orqali harakatlanuvchi yo‘nalishlarga yo‘l harakatida ustuvorlik beriladi.

Yo‘lakning ishga tushirilishi natijasida yo‘lovchi oqimini markazlashtirish, avtobuslar harakatini barqaror va tezkor qilish, shuningdek tashish xizmatining vaqtda va intizomli bajarilishi kutilmoqda. Tirbandliklarni qisqartirish, xavfsizlikni oshirish va jamoat transportidan foydalanish jozibadorligini ko‘tarish asosiy maqsadlardan hisoblanadi.

Harakat ishtirokchilari uchun eslatma

Yo‘lovchilarga:

• avtobuslar yo‘lning o‘rta qismidagi maxsus ajratilgan BRT yo‘lagi orqali harakatlanadi;
• platformaga faqat belgilab qo‘yilgan piyodalar o‘tish joylari orqali chiqing;
• avtobus to‘liq to‘xtagandan so‘ng eshikka yaqinlashing;
• keksalar, nogironligi bo‘lgan shaxslar va bolali yo‘lovchilarga yo‘l bering.

Haydovchilarga:

• markaziy avtobus yo‘lagi (BRT) — faqat avtobuslar uchun;
• ushbu yo‘lakda boshqa transport vositalarining harakatlanishi va to‘xtashi taqiqlangan;
• chapga burilish va orqaga qayrish har ikki yo‘nalishda ham taqiqlanadi;
• yo‘lak cheklarini kesib o‘tish, platforma oldida to‘xtash kabi harakatlar ma’muriy javobgarlikka sabab bo‘lishi mumkin.