Islomobodda sud binosi yonida portlash: 12 kishi halok bo‘ldi, o‘nlab odam yaralandi

11 noyabr kuni kunduzi Pokiston poytaxti Islomobodda jangari tomonidan amalga oshirilgan portlash natijasida kamida 12 kishi halok bo‘ldi, yana 27 kishi yaralandi. Bu haqda jurnalistlarga mamlakat ichki ishlar vaziri Mohsin Naqviy ma’lum qildi.

Uning so‘zlariga ko‘ra, jangari dastlab poytaxt sudi binosiga kirishga uringan, ammo «bunday imkoniyatga ega bo‘lmaganidan so‘ng, u bino yonidagi parkovkada politsiya avtomobiliga hujum qilgan». Politsiya ma’lumoticha, jarohatlanuvchilar asosan yo‘lovchilar yoki sud majlislariga kelgan shaxslar bo‘lgan.

«Biz bu hodisani turli yo‘nalishlarda tekshiryapmiz. Bu shunchaki navbatdagi portlash emas. U aynan Islomobodning o‘zida sodir bo‘ldi, — dedi ichki ishlar vaziri. — Bu ishga kim aralashgan bo‘lmasin — mahalliylarmi yoki boshqa mamlakat fuqarolarimi — jazosiz qolmaydi».

Naqviyning ta’kidlashicha, portlash ortida «Tolibon» harakati va Hindiston bilan bog‘liq jangarilar turgan bo‘lishi mumkin. Keyinroq AP agentligi xabar qilishicha, hujum uchun javobgarlikni Pokiston «Tolibon»ining tarkibidan ajralib chiqqan guruh o‘z zimmasiga olgan.

10 noyabr kechqurun Pokiston maxsus xizmatlari Afg‘oniston chegarasiga yaqin Xaybar-Paxtunxva viloyatida joylashgan armiya kollejida jangarilarning kursantlarni garovga olish urinishini bartaraf etganini ma’lum qildi. Aytilishicha, o‘quv dargohiga bir jangari va yana besh kishi hujum qilgan.

Pokiston hokimiyati bu hujumda Afg‘oniston–Pokiston chegarasida faoliyat yurituvchi guruhni ayblagan, biroq jangarilar bu hujumga aloqadorlikni rad etgan. Guruh vakili Islomoboddagi portlashga ham o‘zlarining aloqasi yo‘qligini bayon qilgan.