O‘zbekistonda ilk bor ona va o‘g‘il o‘rtasida vena transplantatsiyasi amalga oshirildi

Milliy tibbiyot markazida O‘zbekiston tibbiyoti tarixida ilk bor bir insondan boshqasiga teri osti yirik vena (vena saphena magna) transplantatsiyasi muvaffaqiyatli amalga oshirildi.

«Qirg‘izistonlik 71 yoshli ayol oyoqlaridagi og‘ir qon yetishmovchiligi tufayli amputatsiya xavfi ostida edi. Uning 43 yoshli o‘g‘li esa onasini saqlab qolish maqsadida donor bo‘lib, venasi bemorning pastki oyoq arteriyasiga shunt sifatida ko‘chirib o‘tkazildi.

Operatsiya Muzaffar Mamatqulov boshchiligidagi yuqori malakali qon tomir jarrohlari jamoasi tomonidan bajarilgan. Tibbiy nuqtayi nazardan, bu allogen vena transplantatsiyasi bo‘lib, murakkab qon aylanish yetishmovchiligida oyoqni saqlab qolishning eng samarali usullaridan biri hisoblanadi.

Ushbu tarixiy operatsiya bemorning hayotini saqlab qolish bilan birga, O‘zbekiston tibbiyotida yangi sahifa ochilganini yana bir bor tasdiqladi», deyiladi MTM matbuot xizmati xabarida.

Hozirda bemorning ham, donorning ham ahvoli barqaror.