Qoʻshimcha funksionallar
-
Tungi ko‘rinish
Polshada temiryo‘l diversiyalari ishi bo‘yicha Ukraina fuqarosi ushlandi
Ukraina fuqarosi Vladimir B.ga 15–16 noyabr kunlari Polsha temiryo‘l infratuzilmasiga qilingan diversiyalarga ko‘maklashish aybi qo‘yildi. U qamoqqa olingan.
Polshada temiryo‘l infratuzilmasiga qarshi diversiyalar ishi doirasida Ukraina fuqarosi Vladimir B. qo‘lga olindi. Bu haqda dushanba, 24 noyabr kuni Polsha Milliy prokuraturasi ma’lum qildi. Tergov versiyasiga ko‘ra, u diversiya aktlarini tayyorlashda ishtirok etgan va Rossiya maxsus xizmatlari ko‘rsatmalari asosida harakat qilgan.
Prokuratura bayonotida qayd etilishicha, Vladimir B.ga «Rossiya razvedkasi manfaatlarida ishlash va diversiyalarning bevosita ijrochilari (Aleksandr K. va Yevgeniy I.)ga 2025 yil 15–16 noyabr kunlari Mika va Golomb aholi punktlari hududida diversiyalar uyushtirishda ko‘maklashish» bo‘yicha ayblov qo‘yilgan.
Tergov ma’lumotlariga ko‘ra, 2025 yil sentabr oyida Vladimir B. Yevgeniy I.ni rejalashtirilayotgan diversiyalar hududiga olib borgan. Bu unga hududni ko‘zdan kechirish, portlovchi modda joylashtirish uchun nuqtani tanlash, shuningdek tasvir yozib oladigan qurilma va metall elementni relslarga o‘rnatish imkonini bergan.
Gumonlanuvchi 20 noyabr kuni Polsha politsiyasining Markaziy tergov byurosi xodimlari tomonidan qo‘lga olingan. 22 noyabr kuni prokuror taqdimiga binoan sud uni qamoqqa olish to‘g‘risida qaror chiqardi.
Bundan oldin Polsha IIV 15–16 noyabr kunlari Varshava–Lyublin temiryo‘l yo‘nalishi tizimidagi yo‘l qismlariga zarar yetkazgan diversiya Rossiya maxsus xizmatlari tomonidan uyushtirilgan bo‘lishi mumkinligini bildirgan edi. Portlashlar ikki joyda sodir bo‘lgan: Mika posyolkasi (Garvolin shahri yaqinida) va Golomb posyolkasi (Pulavi yaqinida). Zarar ko‘rgan liniya Ukrainaga yuklar yetkazib berishni ta’minlaydi.
Polsha bosh vaziri Donald Tusk ta’kidlashicha, portlashlarda Rossiya maxsus xizmatlari bilan hamkorlik qilgan, ikki nafar Ukraina fuqarosi gumon qilinmoqda. «Aniqlangan shaxslar — Rossiya maxsus xizmatlari bilan uzoq vaqt davomida harakat qilgan va hamkorlik qilgan ikki nafar Ukraina fuqarosi. Bu — bizning maxsus xizmatlarimiz va prokuraturamiz xulosasi, shuningdek ittifoqchi maxsus xizmatlar bilan hamkorlik natijasidir», — degan edi Tusk.
Uning so‘zlariga ko‘ra, har ikki ehtimoliy jinoyatchi kuzda Belarusdan Polshaga kelgan, diversiyadan so‘ng esa Terespol chegara punkti orqali yana Belarus tomon ketgan. Polsha ularning Belarusdan ekstraditsiya qilinishini talab etmoqda.
Taxminiy diversiya yirik avariyalarga olib kelishi mumkin edi, ammo buning oldi olingan. Temiryo‘ldagi ushbu hodisalardan so‘ng Polsha muhim obektlarni qo‘riqlash uchun 10 ming harbiy yuborish va mamlakatdagi Rossiyaning oxirgi bosh konsulxonasini yopish haqida qaror qabul qildi.
