Quritilgan olxo‘ri va o‘rik eksporti bo‘yicha O‘zbekiston dunyoda 3-o‘ringa chiqdi

Prezidentning qishloq xo‘jaligi sohasi vakillari bilan muloqotida ta’kidlanishicha, so‘nggi uch yilda mamlakatda 155 ming gektar yangi bog‘ va tokzorlar barpo etildi, intensiv bog‘lar maydoni 150 ming gektarga yetkazildi. Shu asosda joriy yilda 3,4 million tonna meva, 2 million tonna uzum, 19,5 million tonna sabzavot, poliz mahsulotlari va kartoshka, 1 million tonna dukkakli va moyli ekinlar yetishtirildi.

Qishloq xo‘jaligi mahsulotlari hisobidan ichki bozorda narxlar barqarorligi ta’minlanmoqda, shu bilan birga soha to‘qimachilikdan keyingi eng ko‘p valuta tushumi keltirayotgan yo‘nalishga aylandi. Oziq-ovqat eksporti yil yakuniga qadar tarixda ilk bor 3,2 milliard dollardan oshishi kutilmoqda.

Meva-sabzavot mahsulotlarimiz eksporti geografiyasi ham kengayib bormoqda: ular kirib boradigan davlatlar soni yana 18 taga ko‘payib, jami 83 taga yetdi. Quritilgan olxo‘ri va o‘rikdan tashqari, O‘zbekiston shaftoli va mayiz eksporti bo‘yicha dunyoda 7-o‘rin, gilos bo‘yicha 8-o‘rin, uzum bo‘yicha esa 13-o‘rinni egallamoqda.