Tramp Yevropa yetakchilari bilan Ukraina yuzasidan keskin bahslashganini aytdi

AQSh prezidenti Donald Trampning so‘zlariga ko‘ra, Ukraina tarafdori bo‘lgan Yevropa ittifoqchilari bilan telefon orqali muloqot chog‘ida og‘zaki tortishuv ro‘y bergan. Chorshanba, 10 dekabr kuni jurnalistlar bilan suhbatda u Germaniya kansleri Fridrix Mers, Buyuk Britaniya bosh vaziri Kir Starmer va Fransiya prezidenti Emmanuel Makron bilan bo‘lgan suhbati haqida gapirar ekan, shunday dedi: «Biz Ukraina masalasini ancha keskin so‘zlar bilan muhokama qildik».

«Menimcha, bizda ayrim shaxslar yuzasidan kichik kelishmovchiliklar bo‘ldi. Va biz: “Uchrashishdan oldin, buning nimalarga olib kelishini kutaylik”, dedik», — deb tushuntirdi Oq uy rahbari. Donald Tramp «keskin so‘zlar» deganda nima nazarda tutganini aniqlashtirmadi.

Trampning so‘zlariga ko‘ra, Yevropa rahbarlari hafta oxirida Yevropada Ukrainaga bag‘ishlangan uchrashuv o‘tkazmoqchi bo‘lib, unda AQSh vakillari ham ishtirok etishini istagan. Unda Ukraina prezidenti Volodimir Zelenskiy ham qatnashishi kutilmoqda.

«Biz qarorni ular nima bilan qaytib kelishiga qarab qabul qilamiz. Biz vaqtni befoyda sarf qilishni istamaymiz», — deya urg‘u berdi AQSh prezidenti.

U yana bir bor Zelenskiyni Ukrainada saylov e’lon qilishga va Rossiya bilan tinchlik bitimi imzolashga chaqirdi. «Zelenskiy realist bo‘lishi kerak», — dedi Donald Tramp.

Oq uy rahbari so‘nggi kunlarda Ukraina prezidentini keskin tanqid qilgan hamda uni hozirgi harbiy qonunchilikka ko‘ra o‘tkazib bo‘lmaydigan prezidentlik saylovlarini o‘tkazishga chaqirgan edi.

Volodimir Zelenskiy esa Tramp tanqididan so‘ng, prinsipial jihatdan prezidentlik saylovlariga tayyorligini, lekin ularni o‘tkazish uchun avval ikki masalani hal etish kerakligini aytdi.

Birinchi — AQSh ma’muriyati va Yevropa hamkorlari saylovlar xavfsizligini ta’minlab berishi lozim. Ikkinchisi — xalq irodasining legitimligi uchun zarur bo‘lgan qonuniy asosni yaratish. Zelenskiyning so‘zlariga ko‘ra, u Oliy rada deputatlaridan harbiy holat sharoitida saylov o‘tkazish imkoniyatini ko‘rib chiqadigan huquqiy asos va saylov to‘g‘risidagi qonundagi o‘zgartishlar bo‘yicha qonun loyihalarini tayyorlashni so‘raydi.