10 oyda Saudiyaga borgan o‘zbekistonliklar soni qariyb 70 foizga oshgan

Milliy statistika qo‘mitasi ma’lumotlariga ko‘ra, 2025 yilning 10 oyida Saudiya Arabistoniga safar qilgan o‘zbekistonliklar oqimi sezilarli ko‘paygan. Rasmiy ma’lumotlarga ko‘ra, joriy yil yanvar–oktyabr oylari davomida jami 237,1 ming nafar O‘zbekiston fuqarosi mazkur mamlakatga turistik maqsadlarda borgan.

Statistikaga ko‘ra, safar qiluvchilar sonining o‘sishi o‘tgan yilning mos davri bilan solishtirilganda 96 ming nafarga teng bo‘lib, bu 68 foizlik o‘sishni tashkil etgan.

Qayd etilishicha, Saudiya Arabistoniga borgan fuqarolarning aksariyati safarni aynan sayohat maqsadida amalga oshirgan. Joriy yilning 10 oyida safar maqsadlari kesimida quyidagi ko‘rsatkichlar qayd etilgan:

• sayohat — 197,9 ming nafar;
• qarindoshlarni yo‘qlash — 38,2 ming nafar;
• davolanish — 924 nafar;
• xizmat yuzasidan — 66 nafar;
• o‘qish — 31 nafar.

Ma’lumotlardan ko‘rinishicha, umumiy oqimning asosiy qismi sayohat maqsadidagi safarlarga to‘g‘ri kelgan bo‘lsa, qarindoshlarni yo‘qlash ham Saudiyaga borish sabablari orasida yuqori ulushni saqlab qolmoqda. Davolanish, xizmat safari va o‘qish kabi yo‘nalishlar esa nisbatan kam ulushni tashkil etgan.