Banklar sindikati orqali moliyalashtirish: yangi qoidalar joriy etildi

Adliya vazirligi davlat ro‘yxatidan o‘tkazgan mazkur nizomga ko‘ra, sindikatlashgan kredit — qarz oluvchini birgalikda moliyalashtirish uchun bank sindikati ishtirokchilari tomonidan ajratiladigan mablag‘ hisoblanadi. 

Nizomda bank sindikati ishtirokchilari doirasi ham belgilab qo‘yilgan. Jumladan, banklar bilan bir qatorda xorijiy banklar, xalqaro moliya tashkilotlari yoki o‘z davlat qonunchiligiga muvofiq kredit ajratishga haqli bo‘lgan chet el yuridik shaxslari ham sindikat ishtirokchisi bo‘lishi mumkin. 

Tartibga ko‘ra, qarz oluvchi sindikatlashgan moliyalashtirishni olish uchun bankka ariza bilan murojaat qiladi. Bank bu turdagi moliyalashtirishni ajratish mumkinligi haqida qaror qabul qilsa, qarz oluvchi bilan dastlabki shartlarni kelishib oladi. 

Shundan so‘ng yetakchi ishtirokchi potensial ishtirokchilarga qarz oluvchi haqida ma’lumotlarni o‘z ichiga olgan taklifni yuboradi. Bank sindikati esa ishtirokchilar o‘rtasidagi yozma kelishuv asosida tuzilib, unda o‘zaro munosabatlar, huquq va majburiyatlar belgilanadi. 

Ma’lumot uchun, mazkur hujjat O‘zbekiston Respublikasi Markaziy banki qarori bilan tasdiqlangan bo‘lib, Adliya vazirligida №3730 raqami bilan ro‘yxatdan o‘tkazilgan va muddatsiz amal qiladi.