Zelenskiy: 20 banddan iborat kelishuv 90 foizga tayyor

Ukrainadagi urushni yakunlash bo‘yicha 20 banddan tashkil topgan tinchlik rejasi 90 foizga tayyor. Bu haqda Ukraina prezidenti Volodimir Zelenskiy juma kuni, 26 dekabrda jurnalistlar bilan onlayn muloqot paytida bildirdi. “Bizning vazifamiz — hammasini 100 foiz tayyor holatga keltirish”, — dedi u va “bu oson emas”ligini ta’kidladi.

Ukraina rahbarining so‘zlariga ko‘ra, u 28 dekabr kuni AQSh prezidenti Donald Tramp bilan rejalashtirilgan uchrashuvda Kiyev uchun xavfsizlik kafolatlariga oid hujjatlar to‘plami, shuningdek hududiy masalalar va iqtisodiy rivojlanishni muhokama qilish niyatida. Bu haqda RBK-Ukraina yozadi.

Bundan tashqari, Zelenskiy Moskva tinchlik rejasini imzolashga hech qanday xohish bildirmayotgani masalasini ko‘tarmoqchi. “Rossiya doim rozi bo‘lmaslik uchun sabab qidiradi. <...> Agar Ukraina o‘z pozitsiyasini ko‘rsatsa — u konstruktiv, Rossiya esa, masalan, rozi bo‘lmasa — demak bosim kam”, — deb tushuntirdi Ukraina prezidenti.

Zelenskiy shuningdek, Ukrainada prezident saylovlari va referendum o‘tkazish bo‘yicha qonunchilik tashabbuslari allaqachon mavjud ekanini, ammo bu boradagi asosiy masala xavfsizlikni ta’minlash ekanini qayd etdi.

Ukraina prezidenti ta’kidlashicha, yakuniy tinchlik shartnomasini muzokaralarda ishtirok etayotgan to‘rt tomon — Ukraina, AQSh, Rossiya va Yevroittifoq bilan kelishmasdan turib imzolab bo‘lmaydi.

Zelenskiy ofisida Ukraina va Amerika prezidentlari yakshanba kuni, 28 dekabrda Floridada uchrashishini tasdiqlashdi, deb xabar beradi AFP agentligi.

Bundan oldin Volodimir Zelenskiy Donald Tramp bilan yaqin kunlarda uchrashishini e’lon qilgan edi. “Bir kunni ham boy bermayapmiz. Eng yuqori darajada — prezident Tramp bilan yaqin vaqtda uchrashuv haqida kelishib oldik. Yangi yilgacha ko‘p narsa hal bo‘lishi mumkin”, — deb yozgan u ijtimoiy tarmoqlarda.

Bir kun oldin Ukraina prezidenti AQShning maxsus vakili Stiv Uitkoff va Trampning maslahatchisi Jared Kushner bilan “juda yaxshi” telefon suhbati o‘tkazganini bildirgan. “Ish jarayonining ayrim muhim tafsilotlarini muhokama qildik. Qo‘shma natija va uzoq muddatli tinchlik yo‘lida ish berishi mumkin bo‘lgan yaxshi g‘oyalar bor”, — dedi Zelenskiy.

Avvalroq u Vashington va Kiyev tomonidan kelishilgan, Ukrainadagi urushni to‘xtatish rejasining so‘nggi variantida Ukraina ba’zi yon berishlarga erishganini aytgan edi. Zelenskiy e’lon qilgan 20 bandli hujjat, xususan, frontning hozirgi chizig‘ini muzlatib qo‘yishni nazarda tutadi. Ayni paytda u qo‘shinlarni olib chiqish va demilitarizatsiya qilingan zonalarni yaratish uchun yo‘l ochadi.