20 yanvar kuni Rossiya tashqi ishlar vaziri Sergey Lavrov mamlakat diplomatiyasining 2025 yildagi faoliyati yakunlariga doir matbuot anjumanida chiqish qildi. Associated Press nashri Sergey Lavrov nutqidagi muhim iqtiboslarni jamladi.
Grenlandiya va NATO haqida
Sergey Lavrov AQSh prezidentining Grenlandiyani egallashga qaratilgan urinishlari NATO uchun «chuqur inqiroz» boshlanganidan darak berishini aytdi. Unga ko‘ra, bu «alyansning yagona harbiy-siyosiy blok sifatida saqlanib qolishi masalasini shubha ostiga qo‘yadi».
«Bunday holat yuz berishi mumkinligini avval tasavvur qilish qiyin edi. Bu – NATOning bir a’zosi blokning boshqa bir a’zosiga hujum qiladigan ssenariyni yuzaga keltirishi mumkin», dedi Lavrov matbuot anjumanida.
Uning aytishicha, Donald Trampning harakatlari Rossiya uzoq vaqtdan beri tanqid qilib kelayotgan «qoidalarga asoslangan global tartib» haqidagi G‘arb konsepsiyasini ostin-ustun qilgan.
«Endi qoidalarni ‘Kollektiv G‘arbʼ emas, balki uning faqat bir vakili yozmoqda», dedi Lavrov kinoya bilan. «Bu Yevropa uchun katta larza bo‘ldi va biz buni kuzatyapmiz. Xavfsizlik va hamkorlikni ta’minlashga qaratilgan Yevro-atlantika konsepsiyasi o‘zini oqlamadi».
Lavrovning da’vo qilishicha, Daniyaning Grenlandiya ustidan nazorati mustamlakachilik davridan qolgan meros. «Aslida, Grenlandiya Daniyaning tabiiy bir qismi emas», deya qo‘shimcha qildi u.
Shu bilan birga, Lavrov Rossiya va Xitoy orolga tahdid solishi mumkinligi haqidagi Trampning gaplarini qat’iyan rad etdi.
«Bizning bunga hech qanday aloqamiz yo‘q. Albatta, biz bu jiddiy geosiyosiy vaziyatni kuzatyapmiz va u hal bo‘lgach, xulosalarimizni chiqaramiz», dedi Lavrov.
Trampning «Tinchlik kengashi» borasida
Moskva tashqi siyosatidagi ustuvor yo‘nalishlariga bag‘ishlangan anjumanda so‘zlar ekan, Lavrov Trampning «Tinchlik kengashi» tashabbusini ehtiyotkorona ma’qulladi.
