Zelenskiy blekaut fonida Kiyev shahar ma’muriyatini tanqid qildi

Ukraina prezidenti Volodimir Zelenskiy Rossiya hujumlaridan keyin Kiyevda issiqlik va elektr ta’minoti bilan bog‘liq og‘ir vaziyat uchun mas’uliyatning bir qismini shahar hokimiyati zimmasiga yukladi. “Jihoz-uskunalar qish kirishidan oldinroq sotib olinib, tayyor holatga keltirilishi kerak edi, Kiyev shahar ma’muriyati esa hozir bir necha baravar tezroq harakat qilishi shart — hech bo‘lmaganda fevral oyida odamlarning hayotini yengillatish uchun”, — dedi Zelenskiy chorshanba, 28 yanvar kuni kechqurungi video murojaatida.

28 yanvar kechqurungi holatga ko‘ra, Ukraina poytaxtidagi 639 ta ko‘p qavatli uy issiqlik ta’minotisiz qolganini Kiyev meri Vitaliy Klichko Telegram’da yozdi. Uning aytishicha, RF armiyasining energiya obektlariga bergan zarbalari oqibatlarini bartaraf etish ustida kommunal xizmatlarning 1000 nafardan ortiq xodimi ishlamoqda. Poytaxt mutaxassislariga Lviv, Poltava, Chernixiv, Vinnitsa, Jitomir, Mikolayiv, Odessa, Rovno, Kropivnitskiy va Ukrainaning boshqa shaharlaridan kelgan brigadalar yordam beryapti. Shuningdek, “Ukrzaliznitsya” temiryo‘l kompaniyasi xodimlari ham jalb etilgan.

GFRning Ukrainadagi yangi elchisi Hayko Toms “Suspіlne” telekanaliga bergan intervyusida Germaniya Kiyevga 33 ta mobil issiqlik-elektr stansiyasini yetkazib berishini bildirdi. Ular yaqin vaqt ichida olib kelinadi. “Bu 33 ta qurilma Ukrainada millionlab odamlarni elektr energiyasi bilan ta’minlay oladi. Masala — ularni ulashda, xuddi generatorlarda bo‘lgani kabi. Lekin biz buni imkoni boricha tezroq qilish uchun birga ishlaymiz”, — dedi Toms.

Ukraina poytaxtida Rossiyaning ommaviy zarbalaridan keyin taxminan 610 ming iste’molchi hali ham elektr ta’minotisiz qolmoqda. Bu haqda mamlakat energetika vaziri Denis Shmixal 28 yanvar kuni kechqurun Telegram-kanalida xabar qildi. Uning ta’kidlashicha, tarmoq infratuzilmasiga yetgan shikastlar notekis bo‘lgani sabab Kiyevning energiya tizimidagi vaziyat hali ham murakkabligicha qolmoqda.