Qozog‘istondan chiqarib yuborilgan IT mutaxassis Rossiyada davlatga xiyonatda ayblandi

Xabarga ko‘ra, yanvar oxirida Olmaota politsiyasi Kachkurkinga nisbatan ikki ma’muriy bayonnoma tuzgan: yo‘lni belgilanmagan joydan kesib o‘tgani va yopiq joyda chekkani uchun. “Pervyy otdel” har ikki hujjat tushunarsiz tuzilganini ta’kidlaydi. Shu hujjatlar asosida sud Kachkurkinni “Qozog‘iston qonunlari va suverenitetiga hurmatsizlik” va “huquqbuzarliklarni to‘xtatish hamda oldini olish” zarurati bilan mamlakatdan chiqarib yuborish haqida qaror qabul qilgan. Huquq himoyachilari qayd etishicha, bayonnomalar tuzilganidan to deportatsiyagacha bor-yo‘g‘i bir necha soat o‘tgan, holbuki odatda bunday tartib-taomil haftalar, hatto oylar davom etishi mumkin.

Samolyot Rossiyaga qo‘ngandan so‘ng Kachkurkin ushlangan va sudga olib borilgan. Shanba, 31 yanvar kuni TASS agentligi Moskvadagi Meshchanskiy sudi “davlatga xiyonat” haqidagi jinoyat ishi doirasida “Kachkurkin” familiyali Rossiya fuqarosini tergov izolyatoriga jo‘natganini xabar qildi. Tafsilotlar keltirilmagan. Sud majlisi yopiq tarzda o‘tkazilgan.

“Pervyy otdel” yozishicha, davlatga xiyonat ayblovi Ukrainaga qilingan pul o‘tkazmalari bilan bog‘liq. Bu modda bo‘yicha Kachkurkinga jazo sifatida hatto umrbod ozodlikdan mahrum qilish ham tahdid qiladi. Gumonlanuvchi aybni yoki pul o‘tkazmalari bo‘lgani faktini tan olganmi-yo‘qmi — bu haqda xabar berilmadi. Shu bilan birga, loyiha 2025 yildagi “davlatga xiyonat”, “josuslik” va “xorijiy davlat bilan maxfiy hamkorlik” ayblovlarining 10 foizi Ukrainaga pul o‘tkazmalari bilan bog‘liq bo‘lganini qayd etadi.

Huquq himoyachilari ma’lumotlariga ko‘ra, Aleksandr Kachkurkin — Ukraina fuqarosi, u Qrimda tug‘ilib o‘sgan. 2014 yilda yarimorol qo‘shib olinganidan keyin unga “Rossiya fuqaroligi majburan yuklatilgan”, deb ko‘rsatadi “Pervyy otdel”. Keyinchalik u siyosiy sabablarga ko‘ra Qozog‘istonga ko‘chib o‘tgan. Kachkurkin Olmaotada yashagan va IT sohasida muhandis hamda ishlab chiquvchi bo‘lib ishlagan. Xabar qilinishicha, boshqa ishlar qatorida u GPT til modellarini yaratuvchi kompaniya — OpenAI bilan ham hamkorlik qilgan.