Makron YeI xavfsizlik siyosatini tubdan o‘zgartirishga chaqirdi

Yevropa Ittifoqi o‘z xavfsizlik siyosatini jiddiy tarzda qayta ko‘rib chiqishi kerak, dedi Fransiya prezidenti Emmanuel Makron juma kuni, 13 fevralda Myunxen xavfsizlik konferensiyasida so‘zga chiqar ekan. Makron aytishicha, hozirgi xavfsizlik konsepsiyasi Sovuq urush davrida ishlab chiqilgan bo‘lib, endi u dolzarb emas.

Uning so‘zlariga ko‘ra, Yevropa uzoq muddatli strategik fikrlashga e’tibor qaratishi lozim. Xususan, gap “uzoq masofaga mo‘ljallangan harbiy zarbalar” berish salohiyatini rivojlantirish va Fransiyaning yadroviy tiyib turish tizimi Yevropa xavfsizlik arxitekturasiga qanday integratsiya qilinishi mumkinligini o‘rganish haqida ketmoqda, deb tushuntirdi Makron. U qo‘shimcha qilib aytdiki, bu masala yuzasidan u allaqachon ayrim Yevropa davlatlari yetakchilari bilan maslahatlashuvlarni boshlagan.

“Hozir — kuchli Yevropa uchun ayni vaqt, — dedi Fransiya prezidenti. — Yevropa geosiyosiy derjava bo‘lishni o‘rganishi kerak. Bu bizda ‘DNK’ darajasida mavjud bo‘lgan narsa emas edi”.

Fransiya prezidentining fikricha, Ukrainadagi urushni to‘xtatish Moskva olib borayotgan tajovuzkor siyosatning o‘zgarishiga olib kelmaydi, shuning uchun Yevropa Rossiya bilan kelajakda qanday yonma-yon yashashini oldindan o‘ylab qo‘yishi kerak.

“Hatto Ukraina bo‘yicha kelishuvga erishsak ham, baribir tajovuzkor Rossiya bilan ishlashimizga to‘g‘ri keladi, — dedi Emmanuel Makron. — Biz keskinlashuv xavfini cheklaydigan birga yashash qoidalarini belgilashimiz kerak. Geografiyamiz o‘zgarmaydi. Biz Rossiya bilan qo‘shni bo‘lib yashashda davom etamiz”.

Bundan oldin Germaniya mudofaa vaziri Boris Pistorius DW’ga bergan intervyusida Rossiya rahbariyatining harakatlari faqat Yevropa mintaqasiga emas, balki butun dunyoga ham tahdid solayotganini aytgan.

“Yadroviy tiyib turish masalasida gap ketganda, ittifoq ichida ishonch va ishonchlilikni yo‘qotmasligimiz kerak. Chunki Rossiya — global tahdid. AQSh buni o‘z mudofaa strategiyasida tan olgan, ular bu haqda ochiq yozib qo‘ygan. Bu endi ayrimlar avval aytganidek, faqat mintaqaviy tahdid emas — bu global tahdid. Shuni inobatga olsak, butunlay ravshan: bizning umumiy vazifamiz — har doim tayyor turish”, — dedi Pistorius.