Muvofiqlikni baholash sohasida tadbirkorlar uchun yengilliklar joriy etiladi

Farmonga ko‘ra, 2026 yil 1 apreldan muvofiqlikni baholash organlari tomonidan akkreditatsiya sohasida ko‘rsatilgan pulli xizmatlar tushumidan ajratmalar 2,5 barobarga kamaytirilib, 2 foiz miqdorida belgilanadi va mazkur mablag‘lar to‘liq O‘zbekiston akkreditatsiya markazi ixtiyorida qoldiriladi.

Shuningdek, tadbirkorlar tomonidan 2 va undan ortiq akkreditatsiyadan o‘tgan holda muvofiqlikni baholash xizmatlari yo‘lga qo‘yilgan sohada davlat organlari va tashkilotlari tomonidan yangi sinov laboratoriyalari va sertifikatlash organlari tashkil etilishiga yo‘l qo‘yilmaydi.

Muvofiqlikni baholash organlariga Milliy akkreditatsiya tizimida akkreditatsiyadan o‘tgan holda eksport bozorlarida talab etiladigan xorijiy standartlar asosida baholash ishlarini amalga oshirishga ham ruxsat beriladi.

Bundan tashqari, iqtisodiyotning qator tarmoqlarida ishlab chiqarish va xizmat ko‘rsatish bosqichma-bosqich to‘liq xalqaro standartlar asosida tashkil etiladi:

• 2026 yil 1 iyuldan — to‘qimachilik, charm, mebel, elektrotexnika, avtomobilsozlik va axborot texnologiyalari sohalarida;
• 2027 yil 1 yanvardan — neft va gaz, metallurgiya, transport, qurilish mahsulotlari va tibbiy buyumlar sohalarida;
• 2028 yil 1 yanvardan — energetika, kimyo, ekologiya va xizmat ko‘rsatish sohalarida.

Mazkur choralar milliy sifat infratuzilmasini rivojlantirish, eksport imkoniyatlarini kengaytirish hamda tadbirkorlik faoliyati uchun qulay sharoitlar yaratishga qaratilgan.