Prezident Shavkat Mirziyoyev Toshkent shahrini ijtimoiy-iqtisodiy rivojlantirish, investitsiya va bandlikni oshirish, mahallalarda zamonaviy infratuzilma yaratish masalalari boʻyicha oʻtkazilgan yigʻilishda tadbirkorlik uchun xavfsizlik masalasi muhim ekanini taʼkidladi.
Ichki ishlar vaziriga jinoyatchilikni jilovlash boʻyicha koʻproq ishlash vazifasi qoʻyilgan.
«Jinoyatni jilovlamagunimizcha, ishning barakasi boʻlmaydi, tadbirkor kelmaydi. Mana shuni bilinglar.
Har bir tadbirkor, kompaniya oldin Oʻzbekistonning xaritasini biladi, lekin jinoyatini jilovlanganmi, yoʻqmi... ichki ishlar vaziri mana shuni inobatga olishi kerak.
Hammalaring shuni bilinglar. Kichkina ish qilmayapsizlar. Oʻylamanglar, vaqtincha ish qilaman deb. Bitta narsani bilinglar, shukronalar deyishimiz kerak bu tinchlikka. Lekin ikki karra koʻp ishlashimiz kerak, xalqimiz tinch yashashi uchun. Tinch, bemalol uyida, emin-erkin, qoʻrqmasdan, hech kimdan.
Birorta gʻodaygan boyvachcha paydo boʻlsa, birortangni kechirmayman. Mana shuni bilgin hammang. Davlat boʻlishi kerak. Ana shunda bizda birdamlik boʻladi, hamjihatlik boʻladi, odamlar bizga ishonadi», –degan Shavkat Mirziyoyev «Oʻzbekiston 24» telekanali syujetida.
Shuningdek, hozirgi sharoitda har bir tuman va mahalla imkoniyatlaridan toʻliqroq foydalanish, investitsiyalarni, qoʻshilgan qiymatni va yuqori daromadli ish oʻrinlari sonini oshirish zarurligi taʼkidlangan.
«Har bir tuman hokimi oʻz hududida aholi va turistlarni magnitdek oʻziga tortadigan ikkitadan yirik savdo kompleksi yoki moll tashkil etishi kerak», – degan prezident.
Toshkent shahri hokimi Shavkat Umurzoqov va 12 ta tuman hokimlariga 1-oktabrgacha aniq maydonlar, investorlar va moliyalashtirish manbalarini aniqlash boʻyicha topshiriq berilgan.
«Toshkent hamma uchun barcha sohalarda namuna boʻlishi kerak», – degan prezident.
