“O‘zatom” va Qozog‘iston elchisi yadroviy-ekologik xavfsizlik masalalarini ko‘rib chiqdi

Uchrashuvda tinchlik maqsadlaridagi atom energetikasi sohasida O‘zbekiston–Qozog‘iston hamkorligining asosiy yo‘nalishlari ko‘rib chiqildi. Jumladan, Jizzax viloyatida atom elektr stansiyasi loyihasini amalga oshirish va mintaqada yadroviy hamda ekologik xavfsizlikni ta’minlash masalalari yuzasidan fikr almashildi.

Qozog‘iston tomoni O‘zbekistonning Yadroviy zarar uchun fuqarolik javobgarligi to‘g‘risidagi Vena konvensiyasiga qo‘shilishini (2026 yil 7 fevraldan kuchga kirgan) yuqori baholab, bu qo‘shni davlatlar uchun muhim huquqiy kafolatlarni yaratishini va mamlakatning xalqaro xavfsizlik standartlariga sodiqligini tasdiqlashini ta’kidladi.

Shuningdek, kadrlar tayyorlash, ilmiy tadqiqotlar, radioekologik monitoring, ekologiya va suv masalalari bo‘yicha axborot almashish, ehtimoliy favqulodda vaziyatlarda tezkor xabar berish va chora ko‘rish mexanizmlari yuzasidan hamkorlik istiqbollari muhokama qilindi. Ikki davlat idoralari o‘rtasida doimiy ishchi aloqa kanalini shakllantirish muhimligi qayd etildi.

Tomonlar atom energetikasi bo‘yicha mintaqaviy kompetensiyalar markazi doirasida qo‘shma ta’lim dasturlari, amaliyotlar va ekspert maslahatini rivojlantirishga o‘zaro qiziqish bildirdi.

Shuningdek, Qozog‘iston Atom energiyasi agentligi vakillarining 2026 yilning III–IV choragida “O‘zatom” agentligiga rejalashtirilgan ishchi tashrifi doirasida muloqotni davom ettirishga kelishib olindi.

Uchrashuv yakunida tomonlar mintaqaviy energetika xavfsizligini mustahkamlash va barqaror rivojlanish manfaatlari yo‘lida ochiqlik, shaffoflik va o‘zaro ishonch tamoyillariga sodiqligini tasdiqladi.