Jon Xili: Sulhdan keyin Ukrainaga qo‘shin yuborishni xohlayman

Buyuk Britaniya mudofaa vaziri Jon Xili tinchlikni ta’minlash uchun Ukrainaga britaniyalik harbiylarni yuborgan ilk vazir bo‘lishga umid qilmoqda. U bu haqda yakshanba, 22 fevral kuni The Telegraph nashriga bergan sharhida bildirdi.

Xili ta’kidlashicha, Rossiyaning Ukrainaga qarshi urushi 2026 yilda yakunlanishi kerak. “Har qanday hukumat yoki mudofaa vaziri uchun qurolli kuchlarni boshqa davlatdagi operatsiyaga yuborish haqida qaror qabul qilishdan og‘irroq mas’uliyat yo‘q”, — deb hisoblaydi u. “Men Ukrainaga britan qo‘shinlarini yuborgan aynan o‘sha mudofaa vaziri bo‘lishni xohlayman, chunki bu faqat bir narsani anglatadi: nihoyat bu urush tugagan bo‘ladi”, — deb o‘z pozitsiyasini tushuntirdi Xili.

U qo‘shimcha qilishicha, britaniyalik harbiylarni Ukrainaga yuborish faqat tinchlikka erishilgan taqdirda mumkin. Vazir so‘zlariga ko‘ra, “xavfsiz Yevropa uchun kuchli, suveren Ukraina kerak”.

The Telegraph’ga bergan izohida Xili, shuningdek, Buyuk Britaniya hukumati Ukrainani “yanada qat’iyroq qo‘llab-quvvatlash”da davom etishini ishontirdi. Xususan, mamlakat hokimiyati harbiy yordam hajmini oshirish va Kremlga yangi sanksiyalar orqali bosimni kuchaytirishni rejalashtirmoqda.

“Bu urush bizga — va Putinga bir muhim narsani ko‘rsatdi: ukrain xalqi irodasini hech qachon kam baholash kerak emas”, — deya xulosa qildi u.