Germaniyada avtodiler FSB uchun mashinalar yetkazib bergani uchun 6 yilga qamaldi

Rossiyaga sanksiyalarni buzgan holda lyuks toifadagi 111 ta avtomobil yetkazib bergani uchun Vyursburg shahridagi sud Bavariyadan bo‘lgan avtodilerni 6 yilga qamashga hukm qildi, deb xabar berdi Essen shahri bojxona boshqarmasi 2 mart, dushanba kuni. Mashinalarning oxirgi qabul qiluvchilari orasida FSB, FSO xodimlari, “Rosneft” hamda RF prezidenti ma’muriyati vakillari bo‘lgan.

49 yoshli avtodiler Andreas M. Rossiyaga tovar yetkazib berish bo‘yicha embargoni buzganlikda aybdor deb topildi, deb aniqlik kiritdi tergov bilan shug‘ullangan Essen bojxona boshqarmasi. Erkakning sherigi Inna V. esa 2 yil muddatga shartli jazo oldi. Shuningdek, sud aybdorlardan 18,6 mln yevro undirish haqida qaror chiqardi. Hukmdan oldin aybni tan olish bo‘yicha kelishuv tuzilgan, hozircha hukm qonuniy kuchga kirmagan.

Tergov 2024 yil may oyidan boshlab Essen bojxona boshqarmasi va Vyursburg prokuraturasi tomonidan birgalikda olib borilgan. Qayd etilishicha, avtodiler “bronlangan avtomobillar, avvalo Germaniyaning mashhur ishlab chiqaruvchilaridan birining mashinalarini” sotishga ixtisoslashgan. Tergovchilar bu qaysi kompaniya ekanini aniq aytmagan. Ular e’lon qilgan musodara qilingan mashina suratida esa Mercedes-Benz S-klass ko‘rsatilgan.

Andreas M. bu mashinalarni qalbaki firmalar tarmog‘i orqali sotib olgan. 2022 yilda Rossiyaga lyuks avtomobillar sotishga cheklovlar kiritilganidan keyin, ushbu diler Moskvadagi eng yirik ikki premium avtosalonning asosiy yetkazib beruvchilaridan biriga aylangan. Urushgacha u asosan Qozog‘iston bilan savdo qilgan.

Jami u Rossiyaga qariyb 20 mln yevro qiymatidagi 111 ta avtomobilni yetkazib bergan. Yana 40 mln yevro qiymatidagi 400 ta avto sotilishi oldi olingan.