Ro‘yxatga olishda 8,3 million xonadonda yashovchi aholi qamrab olindi

Ro‘yxatga olish yakunlarining dastlabki ma’lumotlariga ko‘ra, respublika bo‘yicha 8,3 million xonadonda yashovchi aholi to‘liq qamrab olindi. Bu haqda Milliy statistika qo‘mitasi xabar berdi.

Qayd qilinishicha, bu jarayonda qo‘shimcha turar joy obektlari, jumladan yangi qurilgan uy-joylar aniqlangan.

Ta’kidlanishicha, ayrim holatlarda xonadon a’zolarining vaqtincha xorijda bo‘lishi yoki boshqa obektiv sabablar tufayli uyda bo‘lmasligi natijasida kam sonli fuqarolar ro‘yxatga olish jarayonida ishtirok eta olmagan bo‘lishi mumkin. Ushbu fuqarolar aholini ro‘yxatga olish bo‘yicha tashkil etilgan 1851 qisqa raqamli koll-markaziga qo‘ng‘iroq qilsa, qayta o‘rganishni amalga oshiruvchi statistika organi xodimlari ularning xonadoniga borib, ro‘yxatga olish ishlarini o‘tkazadi.

Endi xalqaro tavsiyalarga muvofiq, ma’lumotlarning aniqligi va sifatini baholash maqsadida ro‘yxatga olish natijalarini qayta o‘rganish ishlari ham tashkil etiladi. Buning uchun tasodifiy tanlab olingan xonadonlarga mutaxassislar qayta boradi. Odatda bunday qayta tekshiruvlar umumiy qamrovning o‘rtacha 5-10 foizi doirasida amalga oshiriladi. O‘zbekistonda ham 10 foizgacha qamrov asosida qayta o‘rganish rejalashtirilgan.

Ro‘yxatga olishning dastlabki natijalari 2026 yil 1 iyuliga qadar, yakuniy va to‘liq tahlil qilingan ma’lumotlar esa 2027 yil 1 iyuliga qadar e’lon qilinishi rejalashtirilgan.

Ta’kidlanishicha, fuqarolar taqdim etgan barcha ma’lumotlar amaldagi qonunchilikka muvofiq himoya qilinadi. Shaxsiy ma’lumotlar maxfiy saqlanadi va faqat umumlashtirilgan statistik ko‘rinishda ishlatiladi.