AQSh to‘rt kun ichida qariyb 2 mlrd dollarlik harbiy texnikasini yo‘qotdi - OAV

AQSh Eronga qarshi harbiy operatsiya boshlaganidan buyon qariyb 2 mlrd dollarlik harbiy texnikasidan ayrildi, deb yozmoqda Anadolu agentligi.

Agentlikning ma’lumot berishicha, AQSh umumiy hisobda 1,902 mlrd dollarlik zarar ko‘rgan.

Kuvaytda Amerika uchta F-15E qiruvchi samolyotini yo‘qotgan, ularning qiymati 282 mln dollar deb baholanmoqda. Pentagon samolyotlar xatolik tufayli Kuvayt tomonidan urib tushirilganini ma’lum qildi.

Eron qurolli kuchlarining BAAdagi THAAD raketaga qarshi tizimiga zarbasi oqibatida 500 mln dollarlik zarar yetgan.

AQShning eng yirik yo‘qotishi esa Qatardagi bazada joylashgan qiymati 1,1 mlrd dollarlik radiolokatsiya tizimi bo‘ldi, deb yozadi agentlik. Qayd etilishicha, tizim nizoning birinchi kunidayoq yo‘q qilingan.

Eron shuningdek, AQSh harbiy-dengiz kuchlarining Bahrayndagi Beshinchi floti ta’minot markaziga ham zarba bergan. Bu yerda narxi 20 mln dollar bo‘lgan ikkita sun’iy yo‘ldosh aloqasi terminali va bir nechta bino yo‘q qilingani aytilmoqda.