Apex Development Toshkent markazida 2,6 gektarlik jamoat xiyobon-bog‘ini barpo etmoqda

Toshkentning Mirobod tumanida qurilayotgan Mirabad Square majmuasi doirasida maydoni 2,6 gektar bo‘lgan jamoat xiyobon-bog‘i barpo etiladi. Loyihani Apex Development kompaniyasi xalqaro L.BURO landshaft dizayn studiyasi bilan hamkorlikda amalga oshirmoqda.

Foto: Apex Development

Ma’lum qilinishicha, yangi xiyobon-bog‘ Mirabad Square loyihasining markaziy qismi bo‘lib, u majmua hududining qariyb 18 foizini egallaydi. Uzunligi 530 metr bo‘lgan ushbu yashil hudud nafaqat majmua rezidentlari, balki poytaxt aholisi va mehmonlari uchun ham ochiq bo‘lishi rejalashtirilgan.

«Shahar ichidagi shahar» konsepsiyasi

Mirabad Square loyihasi «shahar ichidagi shahar» konsepsiyasi asosida rivojlantirilmoqda. Majmua hududida turar joylar bilan birga xalqaro maktab va bolalar bog‘chasi, A va B toifasidagi biznes-markazlar, savdo ko‘chasi, fitnes markaz hamda tibbiyot muassasalari joylashishi ko‘zda tutilgan.

Loyihaning asosiy unsurlaridan biri — restoran va qahvaxonalarga ega sayr xiyobon-bog‘i bo‘lib, u shahar markazida dam olish uchun yangi jamoat makoni sifatida tashkil etiladi.

Yashil hudud va piyodalar uchun infratuzilma

Loyiha doirasida xiyobon-bog‘ hududiga bargli daraxtlar, turli butalar va gullaydigan o‘simliklar ekish rejalashtirilgan. Shuningdek, hudud atrofida suv havzalari va favvoralar tizimi barpo etiladi.

Avtomobillar harakatidan xoli piyodalar yo‘laklari, tonggi yugurish va sayr uchun mo‘ljallangan yo‘nalishlar, sport maydonlari, jumladan padel kortlari (padel tennisi uchun maxsus maydon) tashkil etiladi. Qahvaxona va restoranlar esa ochiq osmon ostida dam olish imkonini beradi.

Apex Development va Apex Construction bosh direktori Shuhrat Shamsutdinovga ko‘ra, hududni tuman drayveriga aylantirish ko‘zda tutilgan:

“2,6 gektar maydonda xiyobon-bog‘ barpo etish qarori – zamonaviy shahar muhitini shakllantirishga qo‘shgan ongli hissamizdir. Mirabad Square “shahar ichidagi shahar” konsepsiyasi asosida qurilmoqda va butun tuman taraqqiyotining drayveriga aylanishi ko‘zda tutilgan.

Jamoat xiyobon-bog‘i barcha shahar ahli uchun poytaxt markazidagi yangi diqqatga sazovor maskanga, rezidentlar uchun esa kundalik turmush tarzining ajralmas qismiga aylanadi” dedi u.

Landshaft dizaynini L.BURO ishlab chiqmoqda

Mirabad Square ikki bosqichli qulaylik tamoyili asosida loyihalashtirilgan. Jamoat xiyobon-bog‘i barcha uchun ochiq bo‘lsa, har bir turar joy rezidensiyasida faqat shu yerda yashovchilar uchun mo‘ljallangan yopiq hovli-bog‘lar tashkil etiladi.

Xiyobon-bog‘ning landshaft arxitekturasi konsepsiyasi Rossiyadagi L.BURO studiyasi tomonidan ishlab chiqilmoqda. Studiya jamoat hududlarida tabiat, me’morchilik va shahar muhitini uyg‘unlashtirishga ixtisoslashgan.

“Har bir loyihaga biz hissiy tarixni – inson, tabiat va shahar o‘rtasidagi muloqot ssenariysini kiritamiz. Holatni relef sathlari, taktil tekstura va puxta o‘ylangan yoritish orqali gavdalantiramiz. Nufuzli Apex Development developeri bilan hamkorlikda o‘z tajriba va bilimlarimizni qo‘llashdan mamnunman. Bizda dastlabki g‘oyalar bor. Butun jamoamiz bilan Toshkentning qoq markazidagi yettita osmono‘par rezidensiya ichida Skandinaviya bog‘i konsepsiyasi ustida ishlayapmiz” deydi L.BURO landshaft studiyasi asoschisi va Apex Development bosh arxitektori Pyotr Lari.