O‘zbekiston va Misr gepatit C uchun dori vositalari ishlab chiqaradi

O‘zbekiston Farmatsevtika tarmog‘ini rivojlantirish agentligi hamda Misrning bir qator farmatsevtika kompaniyalari o‘rtasida gepatit C virusiga qarshi dori vositalarini ishlab chiqarish bo‘yicha hamkorlikka kelishildi.

Ma’lum qilinishicha, O‘zbekiston Farmatsevtika tarmog‘ini rivojlantirish agentligi hamda Misrning ACDIMA va Dentafill Plus kompaniyalari vakillari o‘rtasida onlayn muloqot bo‘lib o‘tdi.

Muzokaralarda ikki davlat o‘rtasida farmatsevtika sohasidagi hamkorlikni kengaytirish, zamonaviy dori vositalari ishlab chiqarish texnologiyalarini transfer qilish hamda ularni mahalliylashtirish masalalari muhokama qilindi.

Tomonlar hamkorlikning birinchi bosqichi sifatida O‘zbekiston bozori uchun gepatit C virusiga qarshi Daclatasvir va Sofosbuvir preparatlarini ishlab chiqarishni boshlashga kelishib oldi.

Loyiha doirasida ishlab chiqarish texnologiyalarini bosqichma-bosqich O‘zbekistonga o‘tkazish, misrlik mutaxassislarni jalb etish, mahalliy kadrlarni tayyorlash va ishlab chiqarish quvvatlarini moslashtirish ko‘zda tutilgan.

Bundan tashqari, uchrashuvda mingdan ortiq turdagi dori vositalarini mahalliylashtirish imkoniyatlari hamda O‘zbekistonda insulin ishlab chiqarishni yo‘lga qo‘yish istiqbollari ham ko‘rib chiqildi.

Qayd etilishicha, mazkur hamkorlik milliy farmatsevtika sanoatini rivojlantirish, importga qaramlikni kamaytirish hamda ikki mamlakat o‘rtasidagi sanoat kooperatsiyasini yanada mustahkamlashga xizmat qiladi.