AQSh BMTning Afg‘onistonga yordamini qayta ko‘rib chiqishga erishmoqchi

Vashington Afg‘onistonni qamrab olgan humanitar falokatga qaramay, ushbu mamlakatga ko‘rsatilayotgan xalqaro yordamni qayta ko‘rib chiqishni talab qilmoqda. AQShning BMTdagi doimiy vakili Mayk Uols 9 mart, dushanba kuni BMT Xavfsizlik kengashi yig‘ilishida so‘zga chiqib, Afg‘onistonga yordam uchun ajratilayotgan barcha mablag‘larni sinchiklab qayta tekshirish zarurligini bildirdi. U buni toliblarning murosasizligi va ayollarning eng asosiy huquqlardan mahrum etilayotgani bilan izohladi.

Uning ta’kidlashicha, Afg‘onistonga ko‘maklashish bo‘yicha BMT missiyasi — UNAMA butun dunyodagi BMT maxsus missiyalari orasida eng katta budjetga ega. Ushbu missiyaning mandati kelasi hafta tugaydi. Uols BMTning afg‘on ayol xodimalari hatto o‘z ofislariga kirish huquqiga ham ega emasligini qattiq tanqid qildi.

Toliblar 2021 yil avgust oyida Afg‘onistonda hokimiyatga kelganidan beri ayollar huquqlarini bosqichma-bosqich cheklab kelmoqda, jumladan, ularga ta’lim olish va ishlashni taqiqlab qo‘ygan.

BMT ma’lumotlariga ko‘ra, 17 milliondan ortiq afg‘on, ya’ni mamlakat aholisining uchdan bir qismi oziq-ovqatning o‘tkir taqchilligidan aziyat chekmoqda. 4,9 million ayol va bola davolanishga muhtoj.

UNAMA rahbari vazifasini bajaruvchi Jorjyett Ganon moliyalashtirishning qisqarishi inqirozni yanada kuchaytirishidan ogohlantirdi. Uning so‘zlariga ko‘ra, 2026 yil uchun zarur bo‘lgan 1,71 milliard dollarning faqat o‘n foizigina moliyalashtirilgan.

Pokiston bilan qariyb ikki haftadan beri davom etayotgan mojaro va AQSh hamda Isroilning Eronga qarshi urushi tufayli Afg‘oniston–Eron chegarasidagi og‘ir vaziyat sabab Afg‘onistonda asosiy oziq-ovqat mahsulotlari narxlari oshib bormoqda.