Berlin aeroporti 18 mart kuni ish tashlash sababli barcha reyslarni bekor qiladi

Berlin-Brandenburg xalqaro aeroporti (BER) 18 mart kuni o‘z xodimlari ish tashlashi munosabati bilan muntazam yo‘lovchi reyslarini amalga oshirmaydi. Bu haqda aeroport 16 mart, dushanba kuni ma’lum qildi. Shu kuni reysi rejalashtirilgan yo‘lovchilarga «chiptalarni qayta rasmiylashtirish va safarning muqobil variantlari haqida ma’lumot olish uchun o‘z aviakompaniyasi yoki turoperatori bilan bog‘lanish» tavsiya etildi.

18 mart kuniga kelib-ketish bo‘yicha taxminan 445 ta reys rejalashtirilgan edi, ularning bekor qilinishi taxminan 57 ming yo‘lovchiga ta’sir ko‘rsatadi.

Bundan avval, dushanba kuni Germaniyaning jamoat xizmati sohasi xodimlari kasaba uyushmasi Ver.di aeroportning taxminan 2000 nafar xodimini bir kunlik ish tashlashga chaqirgan edi. Kasaba uyushmasi ularning maoshini 6 foizga va oyiga kamida 250 yevro miqdorida oshirishni talab qilmoqda, ammo aeroport rahbariyati bu talabga rozi emas.

Kasaba uyushmasining bildirishicha, o‘tgan hafta bo‘lib o‘tgan muzokaralarning ikkinchi bosqichida ish beruvchilar 2028 yil oxirigacha amal qiladigan kelishuv doirasida maoshni bir necha bosqichda oshirishni taklif qilgan. Ver.di muzokarachisi Xolger Ryosslerning aytishicha, jami hisobda bu yillik maosh o‘sishiga atigi taxminan 1 foiz qo‘shadi, bu esa narx-navoning o‘sishini hisobga olganda xodimlarning real daromadlari sezilarli pasayishini anglatadi.

«Bu jiddiy taklif emas, balki muzokaralar stoli ortidagi provokatsiyadir», — dedi u.

Berlin aeroporti operatori bo‘lgan kompaniya bosh direktori Aletta fon Massenbax ish tashlashni «nomutanosib chora» deb atadi, ayniqsa «Erondagi urush tufayli vaziyat juda tarang bo‘lib turgan bir paytda».

Tarif bo‘yicha muzokaralarning navbatdagi bosqichi 25 mart kuniga belgilangan. Fon Massenbax «kelishuvga erishilishiga» ishonch bildirdi.