Milliy tabiiy meros obektlarini ro‘yxatga olish tartibi tasdiqlandi

O‘zbekistonda milliy tabiiy meros obektlarini aniqlash, ro‘yxatga olish va muhofaza qilishga qaratilgan yangi tartib joriy etildi. Tegishli hukumat qarori bilan ushbu sohadagi asosiy qoidalar belgilab berildi.

Sayrob qishlog‘idagi chinor daraxti (yoshi 900 yil)

Hukumatning 2026 yil 16 martdagi 106-son qarori bilan “O‘zbekiston milliy tabiiy meros obektlari to‘g‘risida”gi nizom tasdiqlandi.

Nizomga ko‘ra, milliy tabiiy meros obektlarining maqomi, turlari, ularning ro‘yxatini shakllantirish hamda hududlarida qurilish ishlarini amalga oshirish tartibi belgilandi. Ushbu sohada vakolatli organ sifatida Ekologiya va iqlim o‘zgarishi milliy qo‘mitasi belgilangan.

Qayd etilishicha, milliy tabiiy meros obektlari biologik, geologik, gidrologik va paleontologik turlarga ajratiladi.

Tabiiy obektni milliy meros ro‘yxatiga kiritish uchun takliflar vakolatli organning hududiy bo‘linmalariga taqdim etiladi. Taklifga obekt haqida ma’lumotnoma, uning geolokatsiyasi hamda foto va video materiallar ilova qilinishi lozim.

Taqdim etilgan taklif 15 ish kuni ichida ko‘rib chiqiladi. Hududiy bo‘linma tomonidan obekt joyiga chiqqan holda o‘rganilib, natijalari bo‘yicha dalolatnoma rasmiylashtiriladi.

Shundan so‘ng, vakolatli organ hujjatlarni 5 ish kuni ichida ko‘rib chiqib, tabiiy obektni rasmiy ro‘yxatga kiritish to‘g‘risida qaror qabul qiladi.

Mazkur tartib mamlakatda tabiiy meros obektlarini muhofaza qilish va ulardan oqilona foydalanishni ta’minlashga xizmat qiladi.