YeI Ukrainaga “Drujba” orqali neft o‘tkazishni qayta tiklashda yordam beradi

Ukraina Yevropa Ittifoqining “Drujba” neft quvurini tiklashga yordam berish taklifini qabul qildi, deb ma’lum qildi fon der Lyayyen va Koshta. YeI texnik ko‘mak va moliyalashtirishni va’da qildi, uning mutaxassislari esa ishni boshlashga tayyor.

Foto: AP

Yevropa Ittifoqi Rossiya zarbalari natijasida shikastlangan “Drujba” quvuri orqali neft haydashni qayta tiklashda Ukrainaga yordam beradi.

“YeI Ukrainaga texnik ko‘mak va moliyalashtirishni taklif qildi. Ukrainaliklar buni mamnuniyat bilan qarshi oldi va ushbu taklifni qabul qildi”, — deb 17 mart, seshanba kuni Yevropa komissiyasi raisi Ursula fon der Lyayyen va Yevropa kengashi raisi Antoniu Koshta ma’lum qildi.

Ularning so‘zlariga ko‘ra, Ukraina prezidenti Vladimir Zelenskiy “Drujba” neft quvurini ta’mirlash bo‘yicha YeI yordamini qabul qilishga rozilik bildirgan.

“Yevropalik mutaxassislar darhol ishga kirishishga tayyor”, — deya qo‘shimcha qildi fon der Lyayyen va Koshta.

Yevropa kengashi saytida joylashtirilgan qo‘shma bayonotda Yevropa Ittifoqi rahbarlari “Yevropaning barcha fuqarolari uchun energetik xavfsizlikni ta’minlash”ni ustuvor vazifa deb atadi va Markaziy hamda Sharqiy Yevropa davlatlariga Rossiyaga tegishli bo‘lmagan neft tranziti uchun muqobil yo‘nalishlar ustida ishni davom ettirishga va’da berdi.

Zelenskiyga yo‘llangan maktubda Yevropa komissiyasi raisi va Yevropa kengashi raisi “quvurning tezkor ta’mirlanishi” Yevropa Ittifoqiga Ukraina uchun rejalashtirilgan yirik kredit va urushni davom ettirayotgan Rossiyaga qarshi navbatdagi sanksiyalar paketi bo‘yicha qarorlarni tezlashtirish imkonini berishidan umid bildirgan.

“Drujba” neft quvuri orqali Ukraina hududi bo‘ylab Rossiya nefti Vengriya va Slovakiyaga yetkazib berilgan. Ukraina tomoni ma’lumotlariga ko‘ra, quvur yanvar oyida Rossiya zarbasi oqibatida shikastlangan va ishdan chiqqan. Zelenskiy “Drujba” ishi qayta tiklanishigacha yana bir necha hafta o‘tishi mumkinligini aytgan edi.

Budapesht va Bratislavadagi rossiyaparast hukumatlar Kiyevni ta’mirlash ishlarini ataylab cho‘zayotganlikda va ehtimoliy shikastlanishlarni quvurni to‘xtatish uchun bahona sifatida ishlatayotganlikda ayblamoqda. Ana shu bahs sababli Budapesht Rossiyaga qarshi yangi, 20-sanksiyalar paketini to‘smoqda. Bundan tashqari, Vengriya Ukraina uchun 90 milliard yevro miqdoridagi Yevropa Ittifoqi krediti ajratilishiga ham veto qo‘ygan.