Tadbirkorlar reytingida bojxona va tashqi savdo omillari inobatga olinadi

Loyiha prezidentining 2024 yil 23 yanvardagi PQ–39-son qarori, Vazirlar Mahkamasining 2024 yil 30 yanvardagi 55-son qarori hamda 2025 yil 17 dekabrdagi 250-son farmoni ijrosini ta’minlash maqsadida tayyorlangan.

Hujjatga ko‘ra, “Tadbirkorlarning barqarorlik reytingi” elektron platformasi bilan integratsiya qilinadigan axborot tizimlari tarkibi qayta ko‘rib chiqiladi. Shuningdek, reytingni aniqlashda tashqi iqtisodiy faoliyat va bojxona qonunchiligiga rioya etilishiga oid qator yangi mezonlarni inobatga olish taklif etilmoqda.

Xususan, eksport va import operatsiyalarining barqarorligi, tashqi iqtisodiy faoliyat hajmining o‘sish dinamikasi, bojxona auditi natijalari, tashqi savdo intizomi, bojxona to‘lovlarining o‘z vaqtida to‘lanishi hamda bojxona qonunchiligiga rioya etilishi reyting bahosiga ta’sir etuvchi omillar sifatida belgilanmoqda.

Bundan tashqari, tashqi iqtisodiy faoliyatda moliyaviy barqarorlik, jumladan, oxirgi 12 oyda amalga oshirilgan eksportda oldindan to‘lov yoki kafolatli shakllar ulushining 50 foizdan yuqori bo‘lishi, muddati o‘tgan debitor va kreditor qarzdorliklar mavjud emasligi ham alohida mezon sifatida kiritilishi kutilmoqda.

Loyihaga muvofiq, notarif choralar sababli yuzaga kelgan bojxona rasmiylashtiruvi kechikishlari, shuningdek ruxsatnoma va sertifikat taqdim etish vakolatiga ega tashkilotlar ko‘rsatkichlari ham reytingni shakllantirishda hisobga olinadi.

Shu bilan birga, hujjatda tashqi iqtisodiy faoliyat va bojxona qonunchiligiga rioya etilishi ko‘rsatkichlarini baholash uchun maxsus ball tizimi joriy etish taklif etilgan. Unga ko‘ra, uzluksiz tashqi savdo operatsiyalari, qonunbuzilishlar mavjud emasligi, bojxona to‘lovlarining o‘z vaqtida to‘lanishi va auditorlik tekshiruvlarida kamchiliklar aniqlanmasligi tadbirkorlik sub’yektlariga qo‘shimcha ball beradi.

Mazkur o‘zgartirishlar tadbirkorlik sub’yektlarining barqarorlik reytingini aniqlash tizimini yanada takomillashtirish, tashqi savdo va bojxona sohasida intizomni kuchaytirishga xizmat qilishi kutilmoqda.