Hindiston toʻrtinchi oʻrinni saqlab qolgan, Janubiy Koreya esa beshinchi pogʻonani egallagan. Kuchli oʻntalikka Fransiya, Yaponiya, Buyuk Britaniya, Turkiya va Italiya ham kirgan.
Global Firepower boʻyicha eng kuchli 10 armiya va ularning PowerIndex koʻrsatkichi:
- AQSH - 0,0741;
- Rossiya - 0,0791;
- Xitoy - 0,0919;
- Hindiston - 0,1346;
- Janubiy Koreya - 0,1642;
- Fransiya - 0,1798;
- Yaponiya - 0,1876;
- Buyuk Britaniya - 0,1881;
- Turkiya - 0,1975;
- Italiya - 0,2211.
Ushbu tizimda indeks qancha kichik boʻlsa, mamlakatning harbiy salohiyati shuncha yuqori baholanadi. Nazariy jihatdan eng yaxshi natija nol boʻlar edi, biroq loyiha mualliflari amaldagi formula boʻyicha unga erishib boʻlmasligini taʼkidlaydi.
Baholashda harbiy xizmatchilar soni, qurol-yarogʻ va texnika, moliyaviy imkoniyatlar, logistika, tabiiy resurslar hamda geografik sharoit hisobga olinadi. Qoʻshimcha koeffitsiyentlar esa kichik, ammo texnologik jihatdan rivojlangan davlatlarni yirik mamlakatlar bilan taqqoslash imkonini beradi.
2026-yilgi hisob-kitobga aholining internet bilan qamrab olinishi ham kiritilgan. Aviatsiya, quruqlik va dengiz texnikasi, byudjetlar, portlar, aerodromlar, temiryoʻllar hamda avtomobil yoʻllariga oid maʼlumotlar yagona indeksda birlashtiriladi. U mamlakatning oddiy qurollar bilan quruqlikda, dengizda va havoda urush olib borish salohiyatini baholaydi.
Global Firepower bazasida AQSH uchish apparatlarining umumiy soni boʻyicha yetakchi: mamlakat uchun turli vazifalarni bajaruvchi 13 032 ta samolyot va vertolyot qayd etilgan. Amerika floti tarkibida 11 ta avianosets koʻrsatilgan.
Rossiya boʻyicha esa 4 237 ta uchish apparati va 5 630 ta tank keltirilgan. Loyiha hisobida mamlakat 3 603 ta oʻziyurar artilleriya tizimi bilan ushbu toifada birinchi oʻrinda turadi.
Biroq texnika parkining umumiy soni uning barchasi bir vaqtning oʻzida jangovar vazifaga tayyor ekanini anglatmaydi. Loyihada umumiy park va foydalanishga tayyor deb baholangan texnika alohida koʻrsatiladi. Ishonchli maʼlumot yetishmagan hollarda taxminiy hisob-kitoblardan foydalaniladi.
