Jahon poʻlat ishlab chiqaruvchilar assotsiatsiyasi - Worldsteel’ning World Steel in Figures 2026 maʼlumotnomasida mamlakatlarning toʻliq 2025-yildagi natijalari keltirilgan. Reyting 2026-yil uchun prognozni emas, oʻtgan yilda amalda ishlab chiqarilgan poʻlat hajmini aks ettiradi.

Xitoyda 2025-yilda 960,8 million tonna poʻlat ishlab chiqarilgan. Bir yil avval bu koʻrsatkich 1 milliard 5,1 million tonnani tashkil etgan edi. Ishlab chiqarish qisqarganiga qaramay, mamlakatning boshqa davlatlardan ustunligi kattaligicha qolmoqda.

Hindiston esa poʻlat ishlab chiqarishni 149,4 million tonnadan 164,9 million tonnaga yetkazgan. Bu 15,5 million tonna qoʻshimcha mahsulot degani.

AQSH 81,9 million tonna bilan uchinchi oʻrinni egallagan. Yaponiya 80,7 million tonna poʻlat ishlab chiqarib, toʻrtinchi oʻringa tushgan. Rossiya beshinchi, Janubiy Koreya oltinchi oʻrinni saqlab qolgan. Turkiya esa Germaniyadan yuqorilagan.

2025-yilda eng koʻp poʻlat ishlab chiqargan 10 davlat:

  1. Xitoy - 960,8 million tonna;

  2. Hindiston - 164,9 million tonna;

  3. AQSH - 81,9 million tonna;

  4. Yaponiya - 80,7 million tonna;

  5. Rossiya - 67,9 million tonna;

  6. Janubiy Koreya - 62,2 million tonna;

  7. Turkiya - 38,1 million tonna;

  8. Germaniya - 34,1 million tonna;

  9. Braziliya - 33,4 million tonna;

  10. Eron - 32 million tonna.

Jahon boʻyicha umumiy ishlab chiqarish 2024-yildagi 1 milliard 886,8 million tonnadan 2025-yilda 1 milliard 848,9 million tonnaga tushgan. Bu qariyb 2 foizlik pasayishdir. Biroq vaziyat mamlakatlar kesimida farq qilgan: Hindiston va AQShda oʻsish kuzatilgan boʻlsa, Xitoy va Yaponiyada ishlab chiqarish kamaygan.