“Endi piyoda borishmaydi” - chekka joylardagi maktablarga avtobuslar topshirildi

O‘zbekistonning ayrim joylarida bolalar maktabga borish uchun har kuni piyoda 30 daqiqadan 2 soatgacha vaqt sarflaydi. HAYOT Foundation loyihasi doirasida Qoraqalpog‘iston Respublikasi, Surxondaryo, Qashqadaryo, Samarqand viloyatlarining chekka hududlaridagi 4 ta maktabga avtobuslar topshirildi. Bu transport vositasi bolalarning maktabga borishini yengillashtirish va ularning xavfsizligini ta’minlashga xizmat qiladi.

Qoraqalpog‘iston Respublikasining Mo‘ynoq tumanidagi 18-maktabda o‘qiydigan aka-uka Kuvanishboy va Rustam Kuvatbayevlar maktabga borish uchun kuniga 26 kilometr yo‘lni piyoda yoki velosipedda bosib o‘tishadi.

“Piyoda borsak 2,5-3 soatda boramiz. Bemalol yursak 3 soat vaqt ketadi. Velosipedda 1 soatda, mashinada uzog‘i 20 minutda yetib boramiz. Qishda qiyin bo‘ladi, qor yog‘ganda sirg‘anamiz, qo‘rqamiz”, – deydi Rustam.

Ma’lumotlarga ko‘ra, O‘zbekistondagi 146 mingdan ziyod o‘quvchi darsga piyoda boradi va ayrim joylarda bolalar maktabga borish uchun har kuni 30 daqiqadan 2 soatgacha vaqt sarflaydi.

HAYOT Foundation ijtimoiy platformasining “Maktabga xavfsiz harakat” loyihasi aynan shu muammoga yechim topishga qaratilgan.

23 aprel kuni platformaning ishga tushirilishi va uning birinchi amaliyoti sifatida “Maktabga xavfsiz harakat” loyihasiga start berildi. Loyiha doirasida Qoraqalpog‘iston, Surxondaryo, Qashqadaryo va Samarqand viloyatlaridagi chekka hududlarga 4 ta maktab avtobusi topshirildi. Taqdim etilgan avtobuslar bolalarning maktabga borishini yengillashtirishi, eng muhimi xavfsizligini ta’minlashi kutilmoqda.

HAYOT Foundation o‘z faoliyatini inson hayoti, tabiat va madaniy muhit kabi yo‘nalishlarda olib boradi. “Maktabga xavfsiz harakat” esa shu yo‘nalishlardagi amaliy ishlarga o‘tishning birinchi namunasi.

“HAYOT Foundation – ijtimoiy tashabbuslarni qo‘llab-quvvatlash, turli ijtimoiy loyihalarni hayotga tatbiq etish bo‘yicha maxsus platforma hisoblanadi. Davlat tashkilotlari va xususiy sektor vakillarini birlashtiradigan, barcha muammolarga o‘zini yechimi bilan yordam beruvchi yangi tizimdir. Biz asosiy uch yo‘nalishda faoliyat yuritamiz: inson hayoti, tabiat hayoti, madaniy hayot yo‘nalishlarida turli loyihalarimiz mavjud. Bugungi tadbirda uzoq tumanlarda istiqomat qiluvchi bolalar uchun maktab avtobuslari sovg‘a qilindi.

Yangi o‘quv yili boshlanishiga qadar, taxminan avgust oylarida 2-bosqich amalga oshiriladi. Chekka hududlardagi uzoq masofalarda ta’lim oladigan bolalarimiz uchun ham maxsus avtobuslar yetib boradi. 1-bosqichda Qoraqalpog‘iston respublikasi Mo‘ynoq tumani, Qashqadaryo viloyati Kitob tumani, Surxondaryo viloyati Termiz tumani va Samarqand viloyati Nurobod tumanlarini qamrab oldik. Ushbu hududlardan bittadan maktablarni tanlab oldik. Kelgusi bosqichlarda izlanishlar davom etadi. Bu sohada hamkorlarimiz maktab va maktabgacha ta’lim vazirligi mutaxassislari bilan hududlarni yana o‘rganamiz. Shundan kelib chiqib 2-bosqich uchun maxsus ro‘yxat shakllantiramiz”, – deydi loyiha rahbari Kamoliddin Beknazarov.

Platformaning ochilish marosimida bir qator vazirlik va tashkilotlar bilan hamkorlik memorandumlari ham imzolandi.