Tramp Eronni «yer yuzidan supurib tashlash» bilan tahdid qildi

AQSh prezidenti Donald Tramp agar eronliklar Amerikaning «Ozodlik loyihasi» amaliyotida (Ho‘rmuz bo‘g‘ozida qolib ketgan savdo kemalarini xavfsiz olib chiqishga qaratilgan) ishtirok etuvchi kemalariga hujum qiladigan bo‘lsa, Eron «yer yuzidan supurib tashlanishi» bilan tahdid qildi. Bu haqda Tramp Fox News muxbiri Trey Ingstga bergan intervyusida ma’lum qilgan.

«Men prezident Tramp bilan Eron bilan bog‘liq vaziyat haqida 20 daqiqa suhbatlashdim. U «Ozodlik loyihasi» va AQShning Ho‘rmuz bo‘g‘ozidagi savdo kemalarini kuzatib borish bo‘yicha sa’y-harakatlari haqida gapirdi. U Eronga yangi ogohlantirish berib, agar eronliklar bu hududdagi Amerika kemalariga hujum qilishga urinsa, „ular yer yuzidan yo‘q qilinishi“ni aytdi», – degan Ingst Fox News efirida.

Urushni tugatish bo‘yicha muzokaralar qanday ketayotgani haqidagi savolga javoban Tramp eronliklar «ancha murosasoz» bo‘lib qolganini aytgan.

Tramp «Ozodlik loyihasi» haqida 3 may kuni kechqurun e’lon qilgandi. 4 may kuni AQSh qurolli kuchlari Markaziy qo‘mondonligi rahbari, admiral Bred Kuper amerikalik harbiylar Eron tomonidan AQSh harbiy kemalari hamda savdo kemalariga qarata uchirilgan raketa va dronlarni urib tushirganini ma’lum qildi – bu vaqtda ular Ho‘rmuz bo‘g‘ozini kesib o‘tayotgan bo‘lgan. Tramp amerikaliklar Eronning bir necha katerini cho‘ktirib yuborganini qo‘shimcha qilgan.

AQSh va Isroilning Eronga qarshi urushi boshlanganidan buyon Donald Tramp bir necha bor Tehronga vayronkor oqibatlar bilan tahdid qilgan. Xususan, aprel oyi boshida u eronliklar Ho‘rmuz bo‘g‘ozini ochmaydigan bo‘lsa, «jahannam» va «tamaddun halokati» bilan qo‘rqitgandi. Shundan ko‘p vaqt o‘tmay, 8 aprel kuni AQSh Eron bilan vaqtinchalik sulh tuzdi.

CNN va Fox News telekanallari «Ozodlik loyihasi» shusiz ham mo‘rt bo‘lgan va bo‘g‘oz ochilishini ta’minlay olmagan vaqtinchalik sulhni xavf ostida qoldirishini qayd etmoqda. Erondagilar amaliyot o‘t ochishni to‘xtatish tartibini buzish deb hisoblanishi va bo‘g‘ozga kiradigan Amerika kemalariga hujum qilinishidan ogohlantirgan.